ކަސްޓަމުން ބުނީ މިތަކެތި ރާއްޖެއަށް އެތެރެކުރަން އުޅުނީ ކަނޑުމަގުންކަމަށެވެ. މިތަކެތި އަތުލައިގަތީ މާލެ ކޮމާޝަލް ހާބަރަށް ގެނެސްފައިވާ ސީފްރައިޓް ޝިޕްމަންޓެއް ބަލައި ފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބެލުމުން ކަމަށް ކަސްޓަމުން ބުނެއެވެ. އަދި މިތަކެތި ހުރީ އެ ޝިޕްމަންޓްގައި ހުރި މުދާތަކުގެ ތެރޭގައި ފޮރުވާފައި ކަމަށްވެސް ކަަސްޓަމުން ބުނެއެވެ.
އަތުލައިގެން މަސްތުވާތަކެތީގެ ބަރުދަނުގައި ޖުމްލަ 1.518 ކިލޯގްރާމް ހުރިކަމަށް ކަސްޓަމުން ބުނެއެވެ. އަތުލައިގެން މަސްތުވާތަކެތި ފުރަތަމަ މަރުހަލާގައި ޓެސްޓުކުރުމުން މެތުއެމްފެޓަމިން އަށް ޕޮޒިޓިވްވެފައިވާ ކަސްޓަމުން ބުނެއެވެ. އަދި މި މައްސަލަ އިތުރަށް ތަހުގީގުކުރުމަށް މި ތަކެތި ދިވެހިންގެ ފުލުހުންގެ ހިދުމަތާއި ހަވާލުކޮށްފައިވާކަމަށްވެސް މޯލްޑިވްސް ކަސްޓަމުން ބުނެއެވެ.
އަތުލައިގެން މި މަސްތުވާތަކެތީގެ މަގުމަތީ އަގު 3 މިލިއަނަށް ވުރެއް މައްޗަށް އަރައެވެ.
ގަވާއިދާ ހިލާފަށް ރާއްޖެ އައިސް އުޅެނިކޮށް ހދ. މަކުނުދޫ ބޭރުން ފެނުނު ސްރީލަންކާގެ މަސްބޯޓަކުން 400 ކިލޯއަށް ވުރެ ގިނަ މަސްތުވާތަކެތި ސަލާމަތީ ބާރުތަކުން ވަނީ އަތުލއިގެންފައެވެ. އަދި މި ތަކެތީގެ އަގު 1 ބިލިއަން ރުފިޔާއަށް ވުރެ މައްޗަށް އަރާނެކަމަށް ސަރުކާރުން ވަނީ ބުނެފައެވެ.
