ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާ އާއި ގުޅިގެން ކޯޓުގައި ކުރިއަށްދާ މައްސަލަައިގަައި ސިއްރު ހެކިބަސް ބަލައިނުގަތުމަަށް ދައުވާ ރައްދުވާ މީހުންގެ ފަރާތުން އެދިއްޖެ އެވެ.
Advertisement
އެމައްސަލާގައި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް އޮތް މިއަދުގެ އަޑުއެހުމުގައި އޮތީ، ތަހުގީގީ މަރުހަލާގައި ހުށަހަޅާފައިވާ ހުށަހެޅުންތައް ކޯޓަށް ބަލައިގަތުމާއި ނުގަތުމާއިމެދު ގޮތެއް ގޮތެއް ނިންމުމުގެ ކުރިން ދެ ފަރާތުގެ ވާހަކަތައް އަޑުއެހުމަށް ބޭއްވި ޕްރީ ޓްރައިލް މޯޝަން އަޑުއެހުމެކެވެ.
މި އަޑުއެހުމުގައި ދައުވާ ރައްދުވާ ފަރާތުން އެދިފައިވަނީ ދައުލަތުން ހުށަހަޅާފައިވާ، ސިއްރު ހެކިންގެ ހެކިބަސް ބަލައި ނުގަތުމަށެވެ. އެގޮތަށް ހުށަހެޅި ސަބަބެއްގެ ގޮތުގައި ދައްކާފައިވަނީ ރާއްޖޭގައި ހެއްކާއި ބެހޭ އެކަށީގެންވާ ގާނޫނެއް ނެތުމެވެ.
ރައީސް ނަޝީދަށް އަމާޒުކޮށް ގޮށްވާލި ސައިކަލު
ނަމަވެސް ދައުލަތުގެ ފަރާތުން އެދުނީ، ސިއްރު ހެކިބަސް ބަލައިގަތުމަށެވެ.
ދައުލަތުގެ ފަރާތުން މިއަދު ވަނީ، ތަހުގީގުގެ މަރުހަލާގައި "ހަނު ހުރުމަށް އިހްތިޔާރު ކުރުމަށްފަހު" ޝައްކުކުރެވޭ މީހުން، އެމީހުންގެ ދިފާއުގައި ކޯޓު މަރުހަލާގައި އަލިބީ އެޕްލިކޭޝަން ހުށަހެޅުމަށް ކޯޓުން ހުއްދަ ދެވޭނެތޯ ވެސް ސުވާލު އުފައްދާފަ އެވެ.
އެގޮތަށް ސުވާލު އުފައްދާފައިވަނީ، އެ މައްސަލާގައި ދައުވާކޮށްފައިވާ އއ. މާޅޮސް އަސަރީގެ، މުހައްމަދު ނާޒިމް ތަހުގީގު މަރުހަލާގައި ހަނު ހުރުމަށް އިހުތިޔާރުކުރުމަށްފަހު، މިއަދު ކޯޓުގައި "އެވަގުތު އެތަނުގައި ނުހުންނާނެ" ކަމަށް ބުނެފައިވާތީއެވެ.
ދައުލަތުން ބުނީ، އޭނާ ތަހުގީގު މަރުހަލާގައި ހަނު ހުރެފައިވާތީ، އެވަގުތު އެތަނުގައި ނެތްކަން ސާބިތުކުރަން ކޯޓު މަރުހަލާގައި ހެކި ހުށުހެޅުމުގެ ފުރުސަތު ގާނޫނުން ނުދޭ ކަމަށެވެ.
ދެ ފަރާތުގެ ހުށަހެޅުންތަކާއި ހެކިތައް ބަލައިގަތުމާއިމެދު ގޮތް ނިންމުމަށް ބާއްވާ އަޑުއެހުން އޮންނާނީ އަންނަ ބުރާސްފަތި ދުވަހު އެވެ.
ދައުވާކޮށްފައިވާ މީހުންގެ ތަފްސީލް
- ފަހުމީ އަލީ: ފަހުމީގެ މައްޗަށް ކޮށްފައި ވަނީ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެ ދައުވާ އެވެ. އެ ކުށުގެ އަދަބަކީ 17 އަހަރާއި 20 އަހަރާ ދެމެދުގެ ޖަލު ހުކުމެކެވެ.
- މ. ކުދެހިގެ އިސްހާގު: ހަމަލާ ދިނުމުގައި އިސްކޮށް އުޅުނު ކަމަށް ބުނާ އިސްހާގަށް ތިން ދައުވާއެއް ވަނީ ކޮށްފަ އެވެ. އެއީ ގޮވާތަކެތި އެހެން ތަނަކަށް ގެންދިޔުމުގެ ދައުވާ އާއި ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ އެވެ. ގޮވާތަކެތި އެހެން ތަނަކަށް ގެންދިޔުމާއި ޓެރަރިޒަމްގެ އަމަލެއް ކުރުމަށް ރޭވުމުގެ ކުށް ސާބިތުވެއްޖެ ނަމަ 12 އަހަރާއި 15 އަހަރާ ދެމެދުގެ ޖަލު ހުކުމެއް އަންނާނެ އެވެ. އަދި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ ސާބިތުވެއްޖެ ނަމަ އަންނާނީ 17 އަހަރާއި 20 ދެމެދުގެ ޖަލު ހުކުމެކެވެ.
- އއ. މާޅޮސް އަސަރީގެ، މުހައްމަދު ނާޒިމް: ނާޒިމްގެ މައްޗަށް ކޮށްފައި ވަނީ ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ އެވެ. އެ ކުށުގެ އަދަބަކީ 12 އަހަރާއި 15 އަހަރާ ދެމެދުގެ ޖަލު ހުކުމެކެވެ.
- ވ. ތިނަދޫ، ހިޔާ، އަދުހަމް އަހުމަދު ރަޝީދު: ބޮން ގޮއްވާލުމުގައި އަމަލީ ގޮތުން ހަރަކާތެރިވި ކަމުގެ ދައުވާ
- މއ. ފޭރުގޭ މުޖާޒް އަހުމަދު: އަދުހަމް ފިލަން އެހީތެރިވެދިކަމުގެ ތުހުމަތު
- ގއ. ކޮނޑޭ، ފޮޅޭމާ ތަހުމީން އަހުމަދު: ބޮން ގޮއްވާލި ސައިކަލުގެ ވެރިފަރާތް
- ނ. މަނަދޫ، ނޫރީގެ، އަލީ ހައިޝަމް: ބޮން ސައިކަލުގައި ހަރު ކުރި މީހާ
