ފުނަދޫ ސްކޫލުގެ ރަންޔޫބިލް މުނާސަބާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، ފުނަދޫ ރައްޔިތުން އެންމެ ބޮޑަށް އެދެމުން އަންނަ ދެކަމަކީ ސްކޫލުގެ އޮފީސް އިމާރާތެއް ބިނާކޮށްދިނުމަށާއި، ރަށުގެ އާބާދީ ބޮޑުވަމުންދާތީ، ރަށުގެ ބިން ހިއްކާ ދިނުމަށް ކަމަށެވެ.
އެކަންކަމުގައި ސަރުކާރުން ގެންގުޅުއްވާ ވިސްނުން ހާމަކުރައްވާ ރައީސް ވިދާޅުވީ، އެކަންކަން ހިމަނަން ގަސްތުކޮށްފަވަނީ އަންނަ 2023 ވަނަ އަަަހަރުގެ ބަޖެޓުގަ ކަމަށެވެ.
ރައީސްއަށް މަރުހަބާ ދެންނެވުމަށް ފުނަދޫ ރައްޔިތުން---
ސްކޫލުގައިވެސް ހައްލުކުރަންޖެހިފައިވާ ކަންކަން އެބަހުރިކަން އެނގިވަޑައިގަންނަވާކަން ފާހާގަކުރައްވާ ރައީސް ވިދާޅުވީ، އޭގެ ތެރެއިން މިހާރުވެސް 15 ކްލާސްރޫމް މަސައްކަތް ކުރިއަށް އެބަދާ ކަމަށެވެ. އަދި އަމާޒަކީ ޑިސެންބަރު ނިމުމުގެ ކުރިން އެ މަސައްކަތް މުޅިން ނިންމައިލުން ކަމަށް ވިދާޅުވި އެވެ. ނަމަވެސް އެންމެ ބޮޑަށް ސްކޫލަށް ބޭނުން ޖެހިފައިވާ އޮފީސް އިމާރާތް ބިނާކުރަން ބެޖެޓު ކުރެވޭނީ އަންނަ އަހަރު ކަމަށް ވިދާޅުވި އެވެ.
އޭގެ އިތުރުން މިހާރުން މިހާރަށް ގޮތްތަކެއް ހޯދަންޖެހިފައި އޮތް އެންމެ ބޮޑު އެއް ކަމަކީ ރަށް ގިރުމުގެ މައްސަލައަށް ހައްލެއް ހޯދުންކަން ފާހަގަކުރައްވާ ރައީސް ވިދާޅުވީ، އެއީ އަވަސް ހައްލެއް ހޯދަން ޖެހިފައި އޮތް ކަމެއް ކަމަށް ގަބޫލުކޮށް، ލަސްތަކެއްނުވެ ވީހާވެސް އަވަހަށް އެކަމަށް ހައްލެއް ހޯދުމުގެ މަސައްކަތް ސަރުކާރުން ފަށައިދޭނެކަމަށެވެ.
ރަށުގައި ތިބެ ސިއްހީ ހިދުމަތް ކައިރިން ރަނގަޅަށް ލިބޭނެގޮތް ހޯދައިދިނުމަކީ ވެސް، އަމާޒެއްކަން ރައީސް ފާހަގަކުރެއްވި އެވެ. އެ މަސައްކަތުގެ ތެރެއިން، ހޮސްޕިޓަލަށް ބޭނުންވާ އާ އިމާރާތް ބިނާކުރުމުގެ މަސައްކަތްވެސް ލަސްތަކެއްނުވެ ކުރިއަށް ގެންދާނެ ކަމަށް ރައީސް ސޯލިހު ވިދާޅުވި އެވެ.
ފުނަދޫގައި މީހުން އާބާދުވަމުން އައިގޮތް
ފަޅުރަށެއްގެ ގޮތުގައި އޮތް ފުނަދޫ އަކީ މިހާރު ށ. އަތޮޅު ވެރިކަން ކުރާ ރަށެވެ. ފުނަދޫގައި މީހުން އާބާދުވާން ފަށާފައިވަނީ 1968ވަނަ އަހަރު ޖެނުއަރީ އެއް ވަނަ ދުވަހުން ފެށިގެންނެ އެވެ. އެއީ ށ. ޅައިމަގުން، އަތޮޅު އޮފީސް ފުނަދޫއަށް ބަދަލު ކުރެއްވުމާއި ގުޅިގެން ނެވެ. ކުރިން ފުނަދޫ އަށް ކިޔަމުންއައި ނަން (ފަރުކޮޅުފުނަދޫ) "ފުނަދޫ" މިނަމަށް ބަދަލުކުރައްވާފައިވަނީ 12 މާރިޗް 1995ގަ އެވެ.
ސަރުކާރުން ހިންގެވި އާބާދީއާއި ތަރައްގީ އެއްފަސްކުރުމުގެ ސިޔާސަތުގެދަށުން އެރަށަށް އެ އަތޮޅުގެ ނުވަ ރަށަކުން މީހުން ބަދަލުވެފައިވެ އެވެ. އޭގެ އިތުރުން އެއަތޮޅު ފިރުބައިދޫގެ ހުރިހާމީހުން އެރަށަށް ބަދަލުކޮށް 19 އޮގަސްޓް 2004ގައި ފިރުނބައިދޫއަކީ ފަޅުރަށެއް ކަމުގައި ސަރުކާރުން ހަމަޖެއްސެވި އެވެ.
ދިގުމިނުގަ 2350 މީޓަރު ހުންނަ ފުޅާމިނުގައި 450 މީޓަރުގެ ފުނަދޫގެ ބޮޑުމިނަކީ 78 ހެކްޓަރެވެ. މިހާރު އެ ރަށުގެ އާބާދީއަކީ 2715 އެވެ.
