ނ. ހޮޅުދޫ މޭނާ ސްކޫލްގެ އަލިމަސް ޔޫބީލް ޖަލްސާ ޝަރަފުވެރިކޮށްދެއްވާ ވާހަކަފުޅުދައްކަވަމުން، ހޮޅުދޫގެ ބޯހިޔާވަހިކަމުގެ މައްސަލައާއި ބެހޭގޮތުން ރޭ ރައީސް ސޯލިހު ވިދާޅުވީ، އެ ރަށުގެ ބޯހިޔާވަހިކަމުގެ ދަތިކަމަކީ އަވަހަށް ހައްލު ހޯދަންޖެހިފައި އޮތް ކަމެއް ނަމަވެސް ހޮޅުދޫގެ ފަޅުގައި ޖާގަ ނެތުމުން ބިން އިތުރަށް ހިއްކެން ނެތްކަމަށެވެ.
އެހެންކަމުން ހޮޅުދޫގެ ހައުސިން ޔުނިޓް ހޮޅުމީދޫއަށް ބަދަލުކުރަން ސަރުކާރުން ނިންމީ އެގޮތަށް ހޮޅުދޫ ރައްޔިތުންވެސް ބޭނުންވާތީ ކަމަށް ވިދާޅުވި އެވެ.
ހޮޅުދޫގެ އިހްތިސާސްގެ ތެރެއަށް ހޮޅުމީދޫ ސަރުކާރުން އިތުރުކޮށްފައިވަނީ 2020 ވަނަ އަހަރުގެ ސެޕްޓެމްބަރު މަހުގެ ތެރޭގަ އެވެ. އެކަން ކުރައްވާ އެފަހަރު ރައީސް ނެރުއްވި ގަރާރުގައި ވަނީ އެ ބަދަލަކީ ގެންނަން ޖެހޭ ބަދަލެއް ކަމަށް އެމަނިކުފާނަށް ފެނިވަޑައިގަންނަވާ ކަމަށެވެ.
ހޮޅުދޫ އާއި 750 މީޓަރު ދުރުގައި އޮންނަ ހޮޅުމީދޫ އަކީ 28 ހެކްޓަރު ބިމެއް އޮންނަ ފަޅު ރަށެކެވެ. ހޮޅުދޫގައި ބިން ދަތިވުމުގެ މައްސަލަތައް ކުރިމަތިވާތީ ދިރިއުޅުމަށްޓަކައި ހޮޅުމީދޫ ކަނޑައަޅައިދީ ހޮޅުދޫގެ އިހުތިސާސްގެ ތެރެއަށް ހޮޅުމީދޫ ވައްދަދޭން ހޮޅުދޫ ރައްޔިތުން ވަރަށް ކުރިންސުރެ އައީ އެދެމުންނެވެ.
އެކަން އެހެން ނުވެ އޮތީ ރާއްޖޭގެ އިދާރީ ދާއިރާތައް ލާމަރުކަޒީކޮށް ހިންގުމުގެ ގާނޫނުގައި، ރަށެއްގެ ކައުންސިލްގެ އިހްތިސާސަކީ އެ ރަށާއި އެ ރަށުގެ އުރަފަތުން ފެށިގެން 700 މީޓަރު ކަމަށް ބުނާތީ އެވެ.
ނަމަވެސް މި ސަރުކާރުން، ރައީސް އަށް ލިބޭ އިހުތިޔާރުގެ ދަށުން ހޮޅުމީދޫ ހޮޅުދޫ އިހްތިސާސްތެރެއަށް ވެއްދުމުން މިހާރު އެރަށަކީ ހުޅުމީދޫގެ ބައެކެވެ. ރައީސްގެ ވިސްނުންފުޅަކީ ހޮޅުމީދޫ އާބާދުކުރުމެވެ. ހޮޅުމީދޫގެ ބިމުގެ ބޮޑުމިނަކީ 28.3 ހެކްޓަރެވެ.
ދިގުމިނުގައި, 630 މީޓަރު އަދި ފުޅާމިނުގައި 380 މީޓަރު ހުންނަ ހޮޅުދޫގެ ބިމުގެ ބޮޑުމިނަކީ 21.00 ހެކްޓަރެވެ. ހޮޅުދޫގެ ޖުމްލަ އާބާދީއަކީ، 2،218 އެވެ.
