އެމްޖޭއޭ އިން ނެރުނު ނޫސް ބަޔާނެއްގައި ބުނެފައިވަނީ މަސްދަރު ހާމަކުރުމަށް މަޖުބޫރު ކުރެވޭ ހެއްކާއިބެހޭ ގާނޫނޫގެ 136 ވަނަ މާއްދާ އިސްލާހު ކުރަން ގޮވާލާ 158 ނޫސްވެރިޔަކު ސޮއިކޮށް ރައީސުލް ޖުމްހޫރިއްޔާ އަށް ޕެޓިޝަނެެއް ހުށަހަޅާފައި ވާ ކަމަށެވެ.
އެހެން ނަމަވެސް އޭގައިވާ ކަންބޮޑުވުންތަކަށް ބެލުމެއް ނެތި އެކަންކަމަށް ހައްލު ހޯދުމަށް މަޝްވަރާ ކުރުމެއް ނެތި ރައީސް ސޯލިހު އެ ބިލް ތަސްދީދު ކޮށްފައިވާތީ އެ ޖަމިއްޔާއިން އެކަން ކުއްވެރި ކުރާ ކަމަށެވެ.
ޖަމިއްޔާގެ ބަޔާނުގައި ވަނީ މިއީ ގާނޫނު އަސާސީ ކަށަވަރުކޮށްދޭ ހިޔާލު ފާޅުކުރުމުގެ މިނިވަން ކަމާއި، ރައްޔިތުންނަށް ސައްހަ މައުލޫމާތު ލިބުމުގެ ހައްގަށް ސަރުކާރުން ހުރަސްއަޅައި އެ ހައްގުތައް ހަނިކުރުމަށް ހިންގި އަމަލެއް ކަމުގަ އެވެ.
އަދި މިކަމުން އެނގިގެން ދަނީ މީޑިޔާގެ މިނިވަންކަން ކަށަވަރުކޮށްދިނުމަށް ދައުލަތުގެ އިދާރާތަކުން ހެޔޮ ނިޔަތް ނެތް ކަން ކަމަށެވެ.
ހެއްކާބެހޭ ގާނޫނަކީ، މަދަނީ މައްސަލަތަކާއި ޖިނާއީ މައްސަލަތަކުގައި ހެކިބަސް ނެގުމާއި، ހެކި ހުށަހެޅުމާއި، ހެކި ބަލައިގަތުމާއި، ހެކި ވަޒަންކުރުމުގައި ތަބާވާންޖެހޭ އުސޫލުތަކާއި، ކަމެއް ސާބިތުކުރުމަށް ހެކި ބޭނުންވާ ނިސްބަތާއި އެނޫންވެސް ހެއްކާބެހޭ އާންމު އުސޫލުތައް ކަނޑައެޅުމުގެ ގާނޫނެވެ.
މި ގާނޫނުގެ މަގުސަދުތަކުގެ ތެރޭގައި، ގާނޫނުއަސާސީގެ 42 ވަނަ މާއްދާއިން ކަށަވަރުކޮށްދީފައިވާ އިންސާފުން ޝަރީއަތްކުރެވުމުގެ ހައްގު އެގޮތުގައި ކަށަވަރުކޮށްދިނުމަށް ބޭނުންވާ އަސާސީ އެއް އުސޫލު ކަމުގައިވާ ހެކީގެ އުސޫލު ތަފްސޯލުކޮށް ގާނޫނުގައި ބަޔާންކޮށް، ކަނޑައަޅައިދިނުން ހިމެނެ އެވެ.
