ރާއްޖޭގެ އޮންލައިން ނޫހަކުން "މައުލޫމާތު ހޯދާ ލިބިގަތުމުގެ ހައްގުގެ ދަށުން ހޯދަން އެދުނު މައުލޫމާތު ޓްރާންސްޕޯޓް މިނިސްޓްރީން ދީފައި ވާއިރު، 2019 ވަނަ އަހަރުން ފެށިގެން މިނިސްޓަރު ނަހުލާ ވަނީ ރަސްމީ 13 ދަތުރުފުޅެއް ރާއްޖެއިން ބޭރަށް ކުރައްވާފަ އެވެ.
ދެހާސް ނަވާރަ ވަނަ އަހަރުން ފެށިގެން 13 ދަތުރުފުޅެއް މިނިސްޓަރު ނަހުލާ ކުރައްވާފައި ވާއިރު، އެ ދަތުރުފުޅުތަކަށް ދިވެހި ދައުލަތުން ވަނީ، 1،099،495 ރުފިޔާ ހޭދަ ކުރައްވާފަ އެވެ.
އެ މިނިސްޓްރީން އާއްމުކޮށްފައިވާ މައުލޫމާތު ތަކަށް ބަލާއިރު، މިދިޔަ އަހަރުގެ އޮކްޓޯބަރު މަހު ތުރުކީވިލާތުގައި ކުރިއަށް ދިޔަ 12 ވަނަ ޓްރާންސްޕޯޓް އެންޑު ކޮމިއުނިކޭޝަން ފޯރަމްގައި ބައިވެރިވެވަޑައިގަތުމަށް ޓްރާންސްޕޯޓް މިނިސްޓަރު އައިޝަތު ނަހުލާ ކުރެއްވި ދަތުރުފުޅުގެ ކެއުމުގެ ހަރަދުތަކަށް އެކަނި، 87،431 ހަރަދު ކުރައްވާފައި ވާކަން ވަނީ ބުނެފަ އެވެ.
މި ދަތުރުފުޅުގައި މިނިސްޓަރު ނަހުލާ ހިމެނޭހެން ހަތަރު ބޭފުޅަކު ބައިވެރިވެވަޑައިގެންނެވި ކަމަށް އެ މިނިސްޓްރީން ވަނީ ބުނެފަ އެވެ.
މީގެ އިތުރުން މިދިޔަ އަހަރުގެ ފެބްރުއަރީ މަހު މިނިސްޓަރު ނަހުލާ، ތުރުކީއަށް ކުރެއްވި ދެ ދުވަހުގެ ދަތުރުފުޅަކަށް ދިވެހި ދައުލަތުން ވަނީ، 82،709 ރުފިޔާ ހަރަދު ކުރައްވާފަ އެވެ. އެ ދަތުރުގެ ކެއުމާއި، ހުރުމާއި، ޓިކެޓަށްވެސް ހަރަދު ކުރީ ދިވެހި ދައުލަތުންނެވެ.
