އެ ހޮސްޕިޓަލުން ވަނީ ދެ ކުއްޖަކަށް ޑެންގޫ ހުން ޖެހިގެން އައިސީޔޫގައި ފަރުވާ ދެމުން އަންނަ ކަން ކަށަވަރު ކޮށްދީފަ އެވެ. އެހެން ނަމަވެސް މިކަމާއި ގުޅިގެން އިތުރު މައުލޫމާތެއް ހޮސްޕިޓަލުން ހާމަކޮށްފައި ނުވެ އެވެ.
އައިޖީއެމްއެޗްގެ ކުޑަކުދިންގެ ބަލިތަކުގެ ޑޮކްޓަރު، ޑރ. އަހުމަދު ފައިސަލް އާއި ހަވާލާދީ ބައެއް މީޑިއާ ތަކުގައި ބުނެފައިވާ ގޮތުގައި ޑެންގޫ ޖެހިގެން ދެ ކުއްޖަކަށް އައިސީޔޫގައި ފަރުވާ ދެމުން އަންނަ އިރު، ދެވަނަ ކުއްޖާ އައިސީޔޫއަށް ބަދަލު ކުރީ ރޭގެ ވަގުތެއްގައި ކަމަށެވެ.
އަދި މިހާރު އެ ދެކުންދިންގެ ހާލުވެސް މަޑުމަޑުން ރަނގަޅު ވަމުން އަންނަ ކަމަށް ޑރ. ފައިސަލް އާއި ހަވާލާދީ ވަނީ ބުނެފަ އެވެ.
ދެ ކުއްޖަކަށް އައިސީޔޫގައި ޑެންގޫ ޖެހިގެން ފަރުވާ ދެމުން އަންނައިރު، މި އަހަރު ތެރޭ ކުޑަކުއްޖަކު ވަނީ ޑެންގޫ ޖެހިގެން ނިޔާވެފަ އެވެ.
އެޗްޕީއޭއިން ވަނީ ރާއްޖޭގައި ޑެންގީއާއި ރޯގާ އިތުރުވަމުން ދާކަމަށް ބުނެ މިކަމަށް ސަމާލުވާން މީގެ ކުރިން އިލްތިމާސް ކޮށްފަ އެވެ.
ތިން ދުވަހަށް ވުރެ އިތުރަށް ހުން އަންނަ ނަމަ، ނުވަތަ ދިޔާއެއްޗެތި ބޭނުން ނުކުރެވޭ ނަމަ ނުވަތަ މާ ބޮޑަށް ވަރު ދެރަވާނަމަ ޑޮކްޓަރެއްގެ ލަފާ ހޯދުން މުހިއްމު ކަމަށް އެޗްޕީއޭއިން ބުނެއެވެ.
