އާރުޓީއެލް ފެރީގެ ގޮތުގައި ހއ އަދި ހދ އަތޮޅުގައި ދެމުން ގެންދަނީ ލޯންޗް ފެރީތަކެކެވެ.

"ސީއެންއެމް" އަށް މައުލޫމާތުދެއްވަމުން ހދ އަތޮޅު ކައުންސިލްގެ ރައީސް މުހައްމަދު ސިރާޖު މިއަދު ވިދާޅުވީ މޫސުމާއިބެހޭ ގައުމީ އިދާރާއިން ޔެލޯ އެލާޓް ނެރެފައިވާތީ ކަނޑު ދަތުރު ފަތުރުގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އާރުޓީއެލް ފެރީގެ ހިދުމަތްތައް ވަގުތީ ގޮތުން މެދުކަނޑާލާފައިވާ ކަމަށެވެ. 

ސިރާޖު ވިދާޅުވީ އެމްޓީސީސީގެ ފެރީގެ ހިދުމަތަށް ވަރަށް ބޮޑު ޑިމާންޑެއް އަތޮޅު ތެރޭގައި އޮންނަ ކަމަށާއި، މި ހިދުމަތް މެދު ކަނޑާލަން ޖެހުމުން ވަރަށްގިނަ ދަތުރުތައް ހުއްޓިފައިވާ ކަމަށެވެ. 

ސިރާޖު ވިދާޅުވީ ދިއްދޫ އާއި ކުޅުދުއްފުއްޓާއި އަދި ހަނިމާދޫ ދެމެދު ކުރާ ދަތުރު ތަކާއި، މަކުނުދޫ އާއި ހިރިމަރަދޫ، ނައިވާދޫ، ހަނިމާދޫ، ހއ ތުރާކުނު ރޫޓާއި، މާރަންދޫ، ކެލާ، މޮޅަދޫ، އިހަވަންދޫ، ފިއްލަދޫ ރޫޓްގެ ދަތުރުތައް ވެސް ކެންސަލްކޮށްފައިވާ ކަމަށެވެ. 

މެޓް އޮފީހުން ވަނީ މާދަމާ ވެސް މެދު ރާޢްޖެ ތެރެ އާއި އުތުރުގެ އަތޮޅުތަކަށް މޫސުން ގޯސްވާނެ ކަމަށް ލަފާކޮށް ބައެއް ސަރަހައްދުތަކަށް ޔެލޯ އެލާޓް ނެރެފަ އެވެ. އަދި މިދުވަސްވަރު 25 މޭލާއި 30 މޭލާއި ދެމެދުގެ ބާރުމިނެއްގައި ވައި ޖެހޭނެ ކަމަށް ލަފާކޮށް ކަނޑުތައްވެސް ގަދަވާނެ ކަމަށް ވަނީ ލަފާކޮށްފަ އެވެ.