އެމްޑީޕީގެ ކޮންގްރެސް ބޭއްވުމަށް ނިންމާފައި ވަނީ މިމަހުގެ 19 ވަނަ ދުވަހުގަ އެވެ. އެއީ ހުކުރު ދުވަހެކެވެ.
"ސީއެންއެމް" އަށް މައުލޫމާތު ދެއްވަމުން އެމްޑީޕީގެ ކޮންގްރެސްގެ ކަންކަން އިންތިޒާމް ކުރާ ކޮމެޓީގެ މުގައްރިރު އިބްރާހިމް ވަހީދު (އިބުރޭ) ވިދާޅުވީ ސޯސަލް ސެންޓަރުގައި ކޮންގްރެސް ބޭއްވުމަށް ޔޫތު މިނިސްޓްރީ އާއި މަޝްވަރާ ކުރި ކަމަށާއި، ސޯސަލް ސެންޓަރު ލިބޭނެ ކަމަށް ބުނެފައިވާ ކަމަށެވެ.
އިބުރޭ ވިދާޅުވީ ކޮންގްރެސްގައި 1200 އަށްވުރެ ގިނަ މީހުން ބައިވެރި ވުމަށް ހަމަޖެހިފައިވާ ކަމަށާއި، ބައިވެރިވާ ފަރާތްތަކުން އޮންލައިންކޮށް ރަޖިސްޓްރީ ކުރުމަށް ކޮންމެ ބޭފުޅަކަށްވެސް ލިންކެއް ފޮނުވަމުން އަންނަ ކަމަށެވެ.
އެމްޑީޕީގެ ކޮންގްރެސްގައި ބައިވެރި ވެވޭނީ އެޕާޓީގެ ގައުމީ މަޖިލީހުގެ މެންބަރުންނާއި، ޕްރޮވިންސް ތަކުގެ ރައީސުންނާއި، ނައިބުރައީސުންގެ އިތުރުން ދާއިރާ ތަކުގެ ރައީސުންނާއި، އެމްޑީޕީ އަށް ނިސްބަތްވާ ކައުންސިލަރުންނާއި، ގޮފިތަކުގެ ރައީސުންނަށް އެކަނި އެވެ.
އިބުރޭ ވިދާޅުވީ މިމަހުގެ ފަހަކާއި ހަމައަށް ރަޖިސްޓްރޭޝަންގެ މުއްދަތު ކުރިއަށް ގެންދިއުމަށް ހަމަޖެހިފައިވާ ކަމަށާއި، އޭގެ ފަހުންވެސް ރަޖިސްޓްރީ ނުކުރެވިވާ ފަރާތްތަކަށް އެފުރުސަތު ދެއްވުމަށް އަދި މިވަގުތު ހަމަޖެހިފައިވާ ކަމަށެވެ.
