ޗައިނާ އިން މިހެން ބުނެފައި ވަނީ، އެމެރިކާގެ މަޖިލީހުގެ ރައީސް ނެންސީ ޕެލޯސީ ތައިވާން އަށް އެތެރެވެއްޖެނަމަ ތައިވާން އަށް ވަރުގަދަ ހަމަލާތަކެއް ދޭނެ ކަމަށްބުނެ ޗައިނާއިން ދެމުން ދިޔަ އިންޒާރުތަކަށް ގޮންޖަހާ އެމެރިކާގެ މަޖިލީހުގެ ރައީސް ނެންސީ ތައިވާންއަށް ވަޑައިގެނެވުމާއި ގުޅިގެން ނެރެފައިވާ ބަޔާނެއްގަ އެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ހުއާ ސޮއި ކުރައްވާ ނެރެފައިވާ ބަޔާނެއްގައި ބުނެފައިވަނީ، ތައިވާން އަކީ ޗައިނާގެ ބައެއް ކަމަށާއި، މިކަމަކީ ޔުނައިޓެޑް ނޭޝަން ޖެނެރެލް އެސެމްބްލީ އިން ބަލައިގަނެފައިވާ ކަމެއް ކަމަށެވެ.
ތައިވާން އިން އެ ގައުމަކީ މިނިވަން ދައުލަތެއް ކަމަށް ކުރަމުން އަންނަ ދައުވާ އަކީ ބާތިލު ދައުވާއެއް ކަމަށާއި، އެކަމަށް އެމެރިކާ އިން ތާއިދު ކުރުމަކީ ބަލައިގަނެވޭނެ ކަމެއް ނޫން ކަމަށްވެސް ބަޔާނުގައި ވަނީ ބުނެފަ އެވެ.
މީގެ އިތުރުން ބަޔާނުގައި ބުނެފައި ވަނީ، ގައުމު ތަކުގައި މެދުގައި އެމެރިކާ އިން އަބަދުވެސް ފިތުނަ އުފައްދައި ހަމަނުޖެހުން ހިންގުމަށް ބޭނުންވާ ކަމަށާއި، އެމެރިކާ އިން ބޭނުން ވަނީ މުޅި ދުނިޔޭގެ ބާރު ހޯދަން ކަމަށެވެ. އެހެންނަމަވެސް އެކަން ނުވާނެ ކަމަށާއި އެމެރިކާ އިން ބޭނުންވާހާ ކަމެއް ކުރުމަށް ޗައިނާއިން ފުރުސަތު ނުދޭނެ ކަމަށެވެ.
އަދި ޗައިނާއިން އެގައުމުގެ ރައްޔިތުންގެ ދިފާއުގައި ކުރަންޖެހޭ ހުރިހާ ކަމެއް ކުރާނެ ކަމަށްވެސް ވަނީ ބުނެފަ އެވެ.
