ދައުލަތުން ދައުވާ ކޮށްފައި ވަނީ ގދ. ގައްދޫ އަލިފަށުވިގެ މުހައްމަދު ޔަޒީންގެ މައްޗަށެވެ. އޭނާގެ މައްޗަށް ދައުލަތުން ކޮށްފައިވަނީ ގަސްތުގައި މީހެއްގެ މައްޗަށް ބިރު ދެއްކުމުގެ ކުށުގެ ދައުވާ އެވެ.
މި މައްސަލަ އަކީ 19 އޮކްޓޯބަރު 2018 ވަނަ ދުވަހު ޔަޒީން ދިރިއުޅޭ މ. މުއިވިލް ގޭގެ ދެވަނަ ފަންގިފިލާގައި ޒުވާބުކޮށް އޭނާގެ މަންމަ ކަމަށްވާ ގދ. ގައްދޫ އާޒާދުގެ ސާރިޔާ ހުސެއިން ދީދީ މަރާލާނެ ކަމަށް ބުނެ ބިރު ދަށްކާފައިވާ މައްސަލަ އެކެވެ.
މި މައްސަލަ ސާބިތު ކުރުމަށް ދައުލަތުން ހުށަހެޅި ހެކީންގެ ތެރެއިން ގިނަ މީހުން ވަނީ ހެކިބަސް ދޭން ބޭނުން ނުވާ ކަމަށް ބުނެފަ އެވެ. އަދި ބައެއް ފަރާތްތަކުން ހެކިބަހުގައި ބުނެފައި ވަނީ އެއީ ރުޅި އައުމުން ބުނެފައިވާ ބަހެއް ކަމަށާއި، އެކަން މިހާރު ހަނދާން ވެސް ނެތް ކަމަށެވެ.
ފައިސާގެ މައްސަލަ އަކާއި ގުޅިގެން ކުރި މި ޒުވާބުގައި ރުޅި އައުމުގެ ސަބަބުން އެފަދަ ބަހެއް ބުނެވިފައި އޮވެދާނެ ކަމަށާއި، ނަމަވެސް އެފަދަ ގޮތަކަށް މަރާލާނެ ކަމުގެ އިންޒާރު ދީފައިވާ ހަނދާނެއް ނުވަތަ އެފަދަ އަޑެއް އިވިފައި ނުވާ ކަމަށް ވެސް ބައެއް މީހުން ހެކި ބަސް ދެމުން ކޯޓުގައި ބުނެފައި ވެއެވެ.
މައިން ބަފައިންނާ ދެކޮޅަށް އަޑު އުފުލައި ޒުވާބުކޮށް ހެދުމަކީ އިސްލާމް ދީން އެންމެ ބޮޑަށް ނަހީކުރައްވާފައިވާ އަދި ބޮޑެތި އަޒާބު ލިބޭނެ ކަމަށް މާތްﷲ އަންގަވާފައިވާ ކަންތަކުގެ ތެރެއިން ކަމެކެވެ.
ދީނުގައި އަންގަވާފައި ވަނީ މައިންބަފައިންނާ ދިމާލަށް އަދި އެމީހުން މުސްކުޅި ވީދުވަހު "އުއްފް" ވެސް ނުބުނާށެވެ.
