ނޫސްވެރިންނަށް މައުލޫމާތު ދިނުމަށް އެޑިއުކޭޝަން މިނިސްޓްރީން މިއަދު ބޭއްވި ބައްދަލުވުމުގައި މިނިސްޓްރީގެ ސީނިއަރ ޕޮލިސީ ޑިރެކްޓަރ މޫސާ އާދަމް ވިދާޅުވީ، މާލެ ސަރަހައްދުގެ ސްކޫލުތަކުގެ ތެރެއިން މާލެ އާއި ހުޅުމާލެ އަދި ހުޅުމާލޭގެ ދެވަނަ ފިޔަވަހީގައި ދިރިއުޅޭ ފަރާތްތަކުން ކުދިން ސްކޫލުތަކަށް ރަޖިސްޓްރީ ކުރަން ގިނަ އެޕްލިކޭޝަން ތަކެއް ހުށަހެޅިފައިވާ ކަމަށެވެ. 

މޫސަ ވިދާޅުވީ މިހާތަނަށް 5260 އެޕްލިކޭޝަން ފޯމު ލިބިފައިވާ ކަމަށާއި، އޭގެ ތެރެއިން 5100 އެޕްލިކޭޝަން ފޯމު މިހާރު ޕްރޮސަސް ކޮށްފައިވާ ކަމަށެވެ. 

މޫސަ ވިދާޅުވީ ހަމައެކަނި ހުޅުމާލެ އާއި މާލެ އިން 1500 އަށްވުރެ ގިނަ ކުދިން މުޅިން އަލަށް ތައުލީމް ހާސިލްކުރަން ހުށަހަޅާފައިވާ ކަމަށެވެ. 

ހިޔާ ފްލެޓުގައި ދިރިއުޅޭ މީހުންގެ އާބާދީ އިތުރު ވުމާއި ގުޅިގެން އެޑިއުކޭޝަން މިނިސްޓްރީން ވެސް ވަނީ އެ ސަރަހައްދުތަކުގައި ތިބެގެން ކިޔަވައި ދިނުމުގެ އިންތިޒާމުތައް ހަމަޖައްސައި ދިނުމަށް މަސައްކަތްތަކެއް ފަށާފައިވާ ކަމަށް އެޑިއުކޭޝަން މިނިސްޓަރު ޑރ.އައިޝަތު އަލީ ވިދާޅުވި އެވެ.

އެގޮތުން ހުޅުމާލޭ ދެވަނަ ފިޔަވައްސަށް ހާއްސަކޮށްގެން ދެ ސްކޫލަކާއި ޕްރީ ސްކޫލް އެޅުމަށް ހަމަޖެހިފައިވާ ކަމަށްވެސް ވިދާޅުވި އެވެ. 

އެގޮތުން ސަލާހުއްދީން ސްކޫލާއި، އަދި އިތުރު ސްކޫލެއް ހިމެނެ އެވެ. އަދި ކާމިލް ދީދީ ޕްރައިމަރީ ޕްރީ ސްކޫލާއި، ޖަމީލް ދީދީ ޕަރައިމަރީ ޕްރީ ސްކޫލް ހިމެނެ އެވެ. 

މީގެ އިތުރުން ކުވެއިތުގެ ކުންފުންޏެއް ކަމަށްވާ އަލްޖޭރީ ހޯލްޑިން ކިޔާ ކުންފުންޏަކުން ހަދިޔާކޮށްގެން އިމާރާތް ކުރަމުން އަންނަ އިތުރު ސްކޫލެއްވެސް މިނިސްޓަރު މިއަދު ފާހަގަ ކުރެއްވި އެވެ. 

މިނިސްޓަރު މިއަދު ވިދާޅުވީ ތައުލީމީ ދާއިރާއަށް މިވަގުތު 209 ޕްރޮޖެކްޓް ހިންގަމުން އަންނަ ކަމަށެވެ.