ސަބަބަކަށް ވިދާޅުވީ، ގައުމުގެ ހާލަތު މިހާރު އޮތްގޮތުން އެކަމަކީ އާއިލާއިންވެސް އެންމެ ރުހޭ ކަމަކަށް ނުވުމެވެ. އަދި ހުދު އެމަނިކުފާނުވެސް އެމަސްއޫލިއްޔަތު އުފުލަން އިތުރަށް ބޭނުން ނުވުމެވެ. ނަމަވެސް ހަަމަ އެނޭވާގައި އެއީ ދޫކޮށް ނުލެވޭނެ، ޒިންމާއެއް ކަމާއި، ހަވާލުވުން މަޖުބޫރު މަސްއޫލިއްޔަތެއް ކަމުގައިވެސް ވިދާޅުވި އެވެ.
ވެރިކަމާއި ހަވާލުވާން މަޖުބޫރުވާ ސަބަބެއްގެ ގޮތުގައި، ޔާމީން ދެއްކެވީ، ގައުމުގެ މަސްލަހަތާއި، ގައުމިއްޔަތު އަދި އިސްލާމުދީނުގެ ހިމާޔަތާއި ގައުމުގެ މިިނިވަންކަމުގެ ދިފާއުގައި ނިކުމެ، ބަސްބުނެވޭނެ އެއްވެސް ލީޑަރެއް އިތުރަށް ނެތުމެވެ. އަދި ގައުމީ ހާލުގެ ދުލުން ރައީސް ޔާމީނަށް ގޮވާގޮވުންތަކެވެ.
ޔާމީން ވިދާޅުވީ، ޕީޕީއެމްގެ ރިޔާސީ ޓިކެޓު އެމަނިކުފާނާއި ހަވާލުކުރަން ނިންމީ، އެ ޕާޓީގެ 99 ސެނެޓު މެމްބަރުންގެ އިއްތިފާގުން ކަމަށެވެ. އަދި ޕީޕީއެމް ޓިކެޓުގައި 2023 ވަނަ އަހަރު ވާދަކޮށް ރައީސް ޔާމީން ވެރިކަމާއި ހަވާލުވުމަކީ، ރާއްޖޭގެ ހާލަތު މިހާރު އޮތް ހިސާބުން މިއަދު ގައުމުގެ ހާލުގެ ދުލުން ގޮވާ ގޮވުމަކަށް ވެގެންގޮސްފައިވާ ކަމަށް ވެސް ރައީސް ޔާމީން ވިދާޅުވި އެވެ. އެކަން ރޭގެ ޖަލްސާއިން ސާފުކޮށް ފެންނަމުންދިޔަ ކަމަށް ވިދާޅުވި އެވެ.
ރައީސް ޔާމީން ވިދާޅުވީ، ކޮންމެ ސިޔާސީ ލީޑަރެއްގެ ހަކަތައަކީ އޭނާއަށް ބައިތުހިފާ، އޭނާއަށް ތާއީދުކުރާ މީހުން ކަމަށާއި މިއަދު ވެރިކަމުގެ ޒިންމާއާއި ހަވާލުވާން މަސައްކަތް ކުރަން ނިކުމެ ހުންނެވީ އެ މީހުންގެ ތާއީދާއި ދޭ ހިތްވަރާއި، އެހީތެރިކަމުން ކަމަށެވެ.
ނަމަވެސް ޓިކެޓާއި ހަވާލުވުމަކީވެސް، އަދި ވެރިކަމާއި ހަވާލުވުމުގެ ވިސްނުމަކީވެސް އޮތް ވިސްނުމެއް ނޫން ކަމަށް ތަކުރާރުކޮށް އެ ޖަލްސާގައި ވިދާޅުވަމުންދިޔަ އެވެ. އަދި އެމަސައްކަތުގައި ކޯލިޝަން ހަދަންޖެހިއްޖެނަމަ ހެދިނަމަވެސް އެކަމަށްޓަކައި ފަރުތަކާއި، ރަށްތަކާއި، ގިރިތައް ނީލަންކިޔާ ބައިއަޅައިގެން ކޯލިޝަން ހެދުމަކީ ވެސް އެމަނިކުފާނަށް ކުރެވޭނެ ކަމެއް ނޫން ކަމަށް ރައީސް ޔާމީން ވިދާޅުވި އެވެ.
ރައީސް ޔާމީން ވަނީ، އެ ޒިންމާ ހަވާލުކުރެއްވީތީ އެކަމަށް ޕީޕީއެމްގެ ސެނެޓާއި، އެމަނިކުފާނަށް ތާއީދުކުރާ ރައްޔިތުންނާއި ޕާޓީގެ ހުރިހާ މެމްބަރުންނަށް ޝުކުރު ދަންނަވާފައެވެ. ވިދާޅުވީ، މަޖުބޫރުވެގެން އެ މަސްއޫލިޔަތާއި ހަވާލުވިނަމަވެސް އެ ޒިންމާ އާއި މަސްއޫލިއްޔަތު އަދާކުރާނެ ކަަމަށެވެ.
