މިއަދުގެ ކޮންގްރެސްގައި ނަޝީދު ވިދާޅުވީ، ކޮންގްރެސްއަށް އައިސްތިބި ވަރަށް ގިނަ ގޮފިތައް ގަވާއިދާއި ހިލާފަށް އެތަނަށް ވަދެތިބިކަން އެނގޭ ކަމަށެވެ. އެއާއިއެކު ނަޝީދަށް އިތުރަށް ވާހަކަދެެއްކުމުގެ ފުރުސަތު ނުދެއްވާ ކޮންގްރެސްތެރެ ވަރަށް ބޮޑަށް ހޫނުވެ، އަޑުގަދަވެގެން ދިޔަ އެވެ.
ނަޝީދުގެ ވާހަކަ ތަކުރާރުކޮށް، ކުރިއަށް ގެންދަވަން މަސައްކަތްކުރިނަމަވެސް ކޮންގްރެސްމަނުން އެ ފުރުސަތު ނުދެއްވާ އަޑުގަދަ ކުރައްވަމުން ގެންދެވި އެވެ.
އެކަން ހުއްޓުވަން ރިޔާސަތުން ތަކުރާރުކޮށް މަސައްކަތް ކުރުމުންވެސް ކޮންގްރެސްތެރެ އަޑުމަޑުވީ އެތައް ފަހަރަކު އަޑުމަޑުކުރެއްވުމަށް ރިޔާސަތުން އެންގުމަށްފަހު، ބައެއް މެމްބަރުންގެ ނަންވެސް އިއްވުމުން ނެވެ.
އެއަށްފަހު ވާހަކަދައްކަން ފުރުސަތު ދެއްވުމުން ނަޝީދު ވާހަކަފުޅު ފުރިހަމަ ކުރައްވަމުން ވިދާޅުވީ، އެގޮތަށް އެކަން އެތޮސް ޕާޓީގެ އެންމެންނަކީ ޕާޓީގެ ރޫހުގައިތިބޭ ޕާޓީގެ މެމްބަރުންކަމަށް އިއްޔެވެސް ދެންނެވި ކަމަށެވެ. އެއެންމެނާއިއެކު ކޮންގްރެސް ކުރިއަށް ގެންދިއުމުގެ ފުރުސަތު ދޭންޖެހޭނެ ކަމަށްވެސް ވިދާޅުވި ކަމަށެވެ.
އެ ގޮފިތަކުގެ މަންދޫބުންގެ ގާނޫނީ ހައިސިއްޔަތާއި މެދު އެޕާޓީގެ ގިނަ މެމްބަރުންގެ މެދުގައި ކަންބޮޑުވުން އުފެދިފައިވާ ކަމަށް ބުނެ، ކޮންގްރެސް ފެށުމަށް އެއްދުވަހަށްވެފައިވަނިކޮށް ކޮންގްރެސް ފަސްކޮށްދިނުމަށް އެދި މެދުހެންވޭރު ދާއިރާގެ އެމްޑީޕީ މަޖިލިސް މެމްބަރު އަލީ އާޒިމް ވަނީ ސިޓީއެއްވެސް ފޮނުވާފަ އެވެ.
ނަމަވެސް ޕާޓީގެ ޗެއަ ފައްޔާޒު އިސްމާއިލް ވަނީ ކޮންގްރެސް ލަސްކުރަންޖެހޭ ސަބަބެއް ނެތްކަމަށް ބުނެ ކޮންގްރެސް ފަށަން ކަނޑައަޅާފައިވާ ތާރީހަށް ކޮންގްރެސް ފަށާފަ އެެވެ.
