ހަބަރު /
ބަރުލަމާނީ ގަރާރު ހުށަހަނާޅަން ނިންމެވި——ފޮޓޯ: މިހާރު
ގަރާރު އެހަށް ބާއްވާލާނީ، ހައްލު ހޯދާނީ މަޝްވަރާއިން: ނަޝީދު
ފާތިމަތު އަހްމަދު ޝަރީފް
21 އޯގަސްޓް 2022 - 17:52:51
އެމްޑީޕީގެ ކޮންގްރެސްއަށް މިއަދު ހުށަހަޅަން އޮތް ވެރިކަމުގެ ނިޒާމު ބަދަލުކުރުމުގެ ގަރާރު ހުށަނާޅުއްވާ މަޑުކޮށްލަން ނިންމެވީ، މަޝްވަރާއިން ހައްލު ހޯދުމަށް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ
ބަރުލަމާނީ ގަރާރު ހުށަހެޅުއްވުމަށް ޕާޓީގެ ޗެއަ ފައްޔާޒު އިސްމާއިލް ރައީސް ނަޝީދަށް ފުރުސަތު ދެއްވުމުން، ރައީސް ސޯލިހު އާއި ޗެއަ ފައްޔާޒު އާއިއެކު ސްޓޭޖުމަތީގައި ރައީސް ނަޝީދު ވަނީ ކުޑަމަޝްވަރާއެއް ކުރައްވާފަ އެވެ.
އެއަށްފަހު ރިޔާސަތުގައި އިށީދެވަޑައިގެން ވިދާޅުވީ، ގަރާރަށް ބަހުސްނުކޮށް އެހަށް މިހާރު އޮތްގޮތަށް ގަރާރު ބާއްވަން ނިންމަވާފައިވާ ކަމަށެވެ.
“ގަރާރު ހުށަހެޅުމުގެ ކުރީގައި އަދި މިދިޔަ ދެތިން ދުވަހު އަޅުގަނޑަށް ވަނީ ރައީސުލްޖުމްހުރިއްޔާ އާއިއެކީ މަޝްވަރާ ކުރެވިފައި، އަޅުގަނޑުމެން ގަސްތުކުރަނީ މި މަޝްވަރާތައް އަދި ކުރިއަށް ގެންދަން. އެހެންވީމައި، އަޅުގަނޑު ދެކޭގޮތުގައި މިހާރު މިގަރާރު މިއޮތްގޮތަށް މިތަނުގައި މި ގަރާރު ބާއްވާ، އަޅުގަނޑުމެން މިއާއި ދޭތެރޭގައި ބަހުސްނުކޮށް އަދި ރައީސުލްޖުމްހުރިއްޔާ އާއި ތިހުރިހާ ބޭފުޅުންނާއިވެސް އެކުގައި މަޝްވަރާކޮށްގެން އަޅުގަނޑު ދެކޭގޮތުގައި ރަނގަޅުގޮތެއް ގަބޫލުކުރެވޭ ގޮތެއް އަޅުގަނޑުމެން އެންމެނަށް އިރާދަކުރެއްވިޔާ މިކަމުގައި ފެނިގެންދާނެ.” ރައީސް ނަޝީދު ވިދާޅުވި އެވެ.
ނަޝީދު މިގޮތަށް ނިންމެވިކަން އިއުލާންކުރެއްވުމުން ކޮންގްރެސްގެ ރިޔާސަތުން ޗެއަ ފައްޔާޒުވަނީ، އެ އެޖެންޑާ ނިންމާލިކަން އިއުލާންކޮށްފަ އެވެ.
ކޮންގްރެސް ނިންމާލަން ޕާޓީގެ ލީޑަރުގެ ހައިސިއްޔަތުން އެއްޗެއް ވިދާޅުވަން ރައީސް ސޯލިހަށް އެރުވި ފުރުސަތުގައި ރައީސް ސޯލިހު ވަނީ ނަޝީދުގެ ގަރާރު ހުށަނާޅުއްްވަން ނިންމެވި ނިންމެވުމަކީ ރަނގަޅު ނިންމެވުމެއް ކަމަށް ވިދާޅުވެ ތައުރީފުކުރައްވާފަ އެވެ.
0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް
