ރައީސް ސޯލިހު މިގޮތަށް ވިދާޅުވީ، އެމްޑީޕީ ކޮންގްރެސް 2022 އަށް މިއަދު ރައީސް ނަޝީދު ހުށަހަޅުއްވަން އޮތް ވެރިކަމުގެ ނިޒާމު ބަދަލުކުރުމުގެ ގަރާރު ހުށަނާޅަން އެމަނިކުފާނު ނިންމެވުމާއި ގުޅިގެންނެވެ.

ކޮންގްރެސް ނިންމާލަން ޕާޓީގެ ލީޑަރުގެ ހައިސިއްޔަތުން އެއްޗެއް ވިދާޅުވަން ރައީސް ސޯލިހަށް އެރުވި ފުރުސަތުގައި ރައީސް ސޯލިހު ވިދާޅުވީ، ގަރާރު ހުށަނާޅުއްްވަން ނިންމެވި ނިންމެވުމަކީ ރަނގަޅު ނިންމެވުމެއް ކަމަށެވެ.

ކޮންގްރެސް ފެށިއިރު، ތަނުގެ މާހައުލު ވަރަށް ބޮޑަށް ގޯސްކަމަށާއި، ބޮޑެތި ހިޔާލުތަފާތުވުންތަކެެއް ވެސް ހުރި ކަމަށެވެ. އަދި އެންމެބޮޑު ހިޔާލުތަފާތުވުމެއް އޮތީ ނަޝީދުގެ ބަރުލަމާނީ ގަރާރާއި ގުޅިގެން ކަމަށެވެ.

ނަމަވެސް ކޮންގްރެސް މިއަދު ނިމިގެންދަނީ އުފަލާއިއެކު، ފުރިހަމަ މެޗުއަ ޕާޓީއެއްްގެ ގޮތުގައި އޮވެގެން ކަމަށް ރައީސް ވިދާޅުވި އެވެ. 

ބަރުލަމާނީ ގަރާރު ހުށަހެޅުއްވުމަށް ޕާޓީގެ ޗެއަ ފައްޔާޒު އިސްމާއިލް، ރައީސް ނަޝީދަށް ފުރުސަތު ދެއްވުމުން، ރައީސް ސޯލިހު އާއި ޗެއަ ފައްޔާޒު އާއިއެކު ސްޓޭޖުމަތީގައި ރައީސް ނަޝީދު ވަނީ ކުޑަމަޝްވަރާއެއް ކުރައްވާފަ އެވެ.

އެއަށްފަހު ރިޔާސަތުގައި އިށީދެވަޑައިގެން ނަޝީދު ވަނީ، ގަރާރަށް ބަހުސްނުކޮށް އެހަށް މިހާރު އޮތްގޮތަށް ގަރާރު ބާއްވަން ނިންމަވާފައިވާކަން އިއުލާން ކުރައްވާފަ އެވެ.

އެގޮތަށް ނިންމެވީ އިތުރަށް ރައީސް ސޯލިހުއާއި ޕާޓީއާއެކު މަޝްވަރާކުރުމަށްފަހު ހައްލެއް ހޯދުމަށް ކަމަށް ނަޝީދު ވިދާޅުވި އެވެ.