ލަންކާގެ ނޫސްތަކުގައި ބުނެފައިވާ ގޮތުގައި، ގޮތާބާޔަ މިހާރު ދިރިއުޅުއްވަމުން ގެންދަވަނީ ތައިލެންޑުގެ ކުޑަ ހޮޓަލެއްގައި ކަމަށެވެ. އަދި އެމަނިކުފާނުގެ ދިރިއުޅުން ގައިދީއެއްގެ ދިރިއުޅުމާއި އެއްގޮތް ވެފައި ވާކަމަށްވެސް ވަނީ ބުނެފަ އެވެ.
މީގެ އިތުރުން ނޫސްތަކުގައި ބުނެފައިވަނީ، ލަންކާ އަށް އެނބުރި ގޮތާބާޔަ ވަޑައިގަތުމަށް އެދި ވަޑައިގެންފައި ވާކަމަށާއި، އެކަމާއި ގުޅިގެން ސަރުކާރާއި އެކު މަޝްވަރާތައް ކުރައްވާފައި ވާކަމަށެވެ. އަދި އެކަމަށް ސަރުކާރުންވެސް އިއުތިރާޒު ނުކުރާ ކަމަށް ވެސް ނޫސްތަކުން ވަނީ ބުނެފަ އެވެ.
ނޫސްތަކުގައި ބުނެފައި ވާގޮތުގައި ގޮތާބާޔަ މާދަމާގެ ވަގުތެއްގައި ލަންކާއަށް އެނބުރި ވަޑައިގަތުމަށް ވަނީ ހަމަޖެހިފަ އެވެ. އޭއާއި އެކު އެގައުމުގެ ބައެއް ފަރާތްތަކުން ވަނީ ގޮތާބާޔަ ގައުމަށް ވަޑައިގެންފިނަމަ ހައްޔަރު ކުރުމަށް ސަރުކާރަށް ގޮވާލާފަ އެވެ.
ލަންކާގެ ބައެއް ނޫސްތަކުގައި ގޮތާބާޔަ އެނބުރި ވަޑައިގަންނަވާކަމަށް ބުނެފައި ވީނަމަވެސް އެގައުމުގެ ރަސްމީ އެއްވެސް އިދާރާއަކުން އަދި މިހާތަނަށް އެކަން ކަށަވަރު ކޮށްދީފައި ނުވެ އެވެ.
