މެމްބަރު މޮސްޓާ އަކީ، އާއްމު ގޮތެއްގައި ސަރުކާރުގެ ކަންކަމަށް މަޖިލީހުގެ އިތުރުން، އެކިއެކި ޕޯޑިއަމް ތަކުގައި ވަރަށް ބޮޑަށް ފާޑުވިދާޅުވާ ބޭފުޅެކެވެ. އެހެން ނަމަވެސް، ނޮޅިވަރަމްފަރުގެ ފެނާއި ނަރުދަމާގެ މަސައްކަތް ފެށުމަށް އިއްޔެ އެރަށުގައި ބޭއްވި ރަސްމިއްޔާތުގައި ވާހަކަ ދައްކަވަމުން މޮސްޓާ ވަނީ، ރައީސް ސޯލިހަށް ވަރަށް ބޮޑަށް ތައުރީފް ކުރައްވާފަ އެވެ.
އެރަށުގައި ބޭއްވި ރަސްމިއްޔާތުގައި ވާހަކަ ދައްކަވަމުން މޮސްޓާ ވަނީ، ރައީސް ސޯލިހު ރާއްޖޭގެ ރައްތަކުގެ މެދުގައި ތަރައްގީގެ މަޝްރޫއުތައް ހިންގަވާއިރު، ތަފާތު ކުރުމެއް ނުގެންގުޅުއްވާ ކަމަށް ވިދާޅުވި އެވެ.
މީގެ އިތުރުން މޮސްޓާ ވިދާޅުވީ، ރަށުގެ ތަރައްގީއަށް ރައީސް ސޯލިހު މަޝްވަރާ ކުރައްވާއިރު، އެއީ އެމްޑީޕީ މެމްބަރެއްތޯ ނުވަތަ ނޫންތޯ ނުބައްލަވާ ކަމަށާއި، ހަމަހަމަ ކަމާއި އެކު މަޝްވަރާ ކުރައްވާ ކަމަށެވެ.
މޮސްޓާ ވަނީ، މީގެ ދުވަސްކޮޅެއް ކުރިން، ލ. ގަމުގައި ބޭއްވި ވިޔަވަތި ރާއްޖެ ކޮންފަރެންސްގައި ވެސް ސަރުކާރުން ދައުވަތު ދެއްވައިގެން ބައިވެރިވެވަޑައިގެންފަ އެވެ. އެ ކޮންފަރެންސްގައި ލިބުނު ފުރުސަތުގެ ތެރެއިން ނޮޅިވަރަންފަރާއި، ދާއިރާގެ ތަރައްގީއަށް ނުވެ ހުރި ކަންކަން އަވަސްކޮށް ދެއްވުމަށް ރައީސް އަރިހު ދެންނެވިކަމަށް އިއްޔެގެ ރަސްމިއްޔާތުގައި މޮސްޓާ ވިދާޅުވި އެވެ.
