މިދިޔަ ހަފްތާގެ ބުދަ ދުވަހުގެ ހެނދުނު 11:00 އަށް މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީއަށް އޮތީ، ޓްރާންސްޕޯޓް ޓްރާންސްޕޯޓް މިނިސްޓްރީގެ އަހަރީ ރިޕޯޓް އެޖެންޑާ ކޮށްފަ އެވެ.
އެހެން ނަމަވެސް 11:15 ވީ އިރުވެސް ކޮމިޓީއަށް މިނިސްޓަރު ނަހުލާ ވަޑައިނުގަތުމުން، މެމްބަރުން ވަނީ އެކަމާއި މެދު ނުރުހުން ފާޅުކޮށް، މިނިސްޓަރު ނަހުލާއަށް ވަރަށް ބޮޑަށް ފާޑުވިދާޅުވެފަ އެވެ. އަދި މިނިސްޓަރު ނަހުލާ ތަކުރާރުކޮށް ގަޑިޖެހޭ ކަމަށްވެސް ބައެއް މެމްބަރުން ވަނީ ވިދާޅުވެފަ އެވެ.
މިއަދު އޮތް މަޖިލީހުގެ ކޮމިޓީއަށް މިނިސްޓަރު ނަހުލާ ވަނީ ހާޒިރުވެވަޑައިގެންފަ އެވެ. ކޮމިޓީގައި ވާހަކަ ދައްކަވާ ނިންމަވާލައްވަމުން މިނިސްޓަރު ނަހުލާ ވަނީ، މިދިޔަ ބުދަ ދުވަހު ކޮމިޓީއަށް ވަޑައިގަތުމަށް ލަސް ވެދާނެ ކަމަށް މަޖިލީހުގެ އިދާރާއަށް އަންގާފައި ވާނެ ކަމަށް ވިދާޅުވެފަ އެވެ. އަދި އެއީ ދިމާވި ކަމެއްގެ ސަބަބުން ކަމަށްވެސް މިނިސްޓަރު ނަހުލާ ވިދާޅުވި އެވެ.
މިނިސްޓަރު ނަހުލާ ވިދާޅުވީ، ވަޒީރެއްގެ ކުރިން އެބޭފުޅާއަކީ، އިންސާނެއް ކަމަށާއި، އަންހެނަކަށް ވީތީ ދިމާވެދާނެ ހާލަތްތަކެއް އޮވެދާނެ ކަމަށެވެ. އަދި އަންހެނުންނަކީ މަހަކު އެއްފަހަރު މައްސަރު ކަން ލައިގަންނަ ބައެއް ކަމަށާއި، އެދުވަހު މަޖިލީހަށް އައުން ލަސްވީ އެހެން ވެގެން ކަމަށް މިނިސްޓަރު ވިދާޅުވި އެވެ.
އަދި މަޖިލީހަށް ލަހުން ވަޑައިގެންނެވީ މަޖިލީހުގެ އިހުތިރާމް ކުޑަކުރުމުގެ ގޮތުން ނޫން ކަމަށްވެސް ނަހުލާ ވަނީ މިއަދު ވިދާޅުވެފަ އެވެ.
މިދިޔަ ހަފްތާގެ ބުދަ ދުވަހު ކޮމިޓީގެ މެމްބަރުން ވަނީ، މިނިސްޓަރު ނަހުލާ ކޮމިޓީއަށް އައުމަށް އަމުރު ނެރެ ދިނުމަށް ވެސް ކޮމިޓީގެ މުގައްރިރުގެ ކިބައިން އެދިފަ އެވެ.
