މަސައްކަތްތެރިންނަށް މުސާރައިގެ ގޮތުން އެންމެ ކުޑަމިނުން ދޭންޖެހޭ އުޖޫރަ ކަނޑައަޅައި، މިނިމަމް ވޭޖު ދޭން މަޖުރޫބުވާ ގޮތަށް ވަޒީފާއާ ބެހޭ ގާނޫނު އިސްލާހުކުރީ 2020 ވަނަ އަހަރުގެ ތެރޭގައެވެ.
އެފަހަރު ގެނައި އިސްލާހުގައި ވާގޮތުން، ގާނޫނަށް އަމަލުކުރަން ފަށާތާ ދެ އަހަރުގެ ތެރޭގައި މިނިމަމް ވޭޖު ބިދޭސީންނަށް ވެސް ދޭން ޖެހޭނެ އެވެ.
ނަމަވެސް 2020 ވަނަ އަހަރުގެ ޖެނުއަރީ ތެރޭ އަމަލުކުރަން ފެށި އެ އިސްލާހު، އިސްލާހުކުރަން ސަރުކާރުގެ ފަރާތުން މިމަހުގެ ހަތްވަނަ ދުވަހު ރައްޔިތުންގެ މަޖިލީހަށް ވަނީ ހުށަހަޅަައިފައެވެ.
އެ އިސްލާހު އިއްޔެގެ މަޖިލީހުން ފާސްވުމާއިއެކު، ހަމަ އިއްޔެ ރައީސް ވަނީ އެ އިސްލާހު ތަސްދީގުކުރައްވާފައެވެ.
މިފަހަރު ތަސްދީގުކުރި އިސްލާހުގައި ބުނެފައިވަނީ، ރާއްޖޭގައި މަސައްކަތްކުރާ ފަރާތަކީ ބިދޭސީއެއް ނަމަ، ދިވެހިރާއްޖޭގެ އިގްސާދީ ހާލަތަށާއި ގައުމުގެ ފުދުންތެރިކަމާއި އުފެއްދުންތެރިކަމަށް ރިއާޔަތްކޮށް މިނިމަމް ވޭޖް އެޑްވައިޒަރީ ބޯޑުން، އިކޮނޮމިކް މިނިސްޓަރީއަށް ދޭ ލަފާގެމަތިން، މިނިމަމް ވޭޖް ދޭނެ ތާރީހެއް ކަނޑައަޅާނީ، މިނިސްޓަރު ފައްޔާޒު ކަަމަށެވެ.
އެ އިސްލާހު ތަސްދީގުކުރެއްވުމާއި އެކު އިއްޔެ ސަރުކާރުގެ ގެޒެޓް ގައި ޝާއިއުކޮށް ވަނީ އަމަލުކުރަން ފެށިފަ އެވެ.
މަސައްކަތްތެރިންނަށް ދެވޭ އެންމެ ކުޑަ އުޖޫރަ ކަނޑައަޅައި އިއުލާންކޮށްފައިވަނީ 2021 ވަނަ އަހަރުގެ ނޮވެމްބަރު މަސްތެރޭގައެވެ.
އެގޮތުން ކަނޑައަޅާފައިވާ އުޖޫރަ
- އެންމެ ކުދި ވިޔަފާރިތަކަށް މަހަކު 4500 ރުފިޔާ،
- މެދު ފަންތީގެ ވިޔަފާރިތަކަށް މަހަކު 7000 ރުފިޔާ،
- ބޮޑެތި ވިޔަފާރިތަކަށް މަހަކު 8000 ރުފިޔާ،
- ސިވިލް ސާވިސް އަށް މަހަކު 7000 ރުފިޔާ ވަނީ ކަނޑައަޅާފައެވެ.
