ތިންވަނަ ދައުރަކަށް މަޖިލީހުގައި އެމްޑީޕީގެ މެންބަރެއްގެ ގޮތުގައި އިންނަވާ، އަދި ގާނޫނީ ވަކީލް އިމްތިޔާޒް ފަހުމީ، ބަންޑާރަ ނާއިބު އިބްރާހީމް ރިފްއަތަށް ފާޑުވިދާޅުވީ، މިހާރު މަޖިލީހުގައި ބަހުސް ފެށިފައިވާ ފަނޑިޔާރުންގެ ގާނޫނާ ގުޅޭ ގޮތުން ވާހަކަ ދައްކަވަމުންނެވެ. މި ގާނޫނުގެ ބަހުސް މަޖިލީހުގެ ތަޅުމުގައި ފެށުމުގެ ކުރިން ބަންޑާރަ ނާއިބުވަނީ އެ ބިލަށް އިސްލާހެއް ހުށަހަޅުއްވާފައެވެ.
މަޖިލީހުގެ ޖުޑީޝަރީ ކޮމިޓީގެ މުގައްރިރުކަންވެސް ކުރައްވާ އިމްތިޔާޒް ވިދާޅުވީ މަޖިލީހަށް ސަރުކާރުން ހުށަހަޅާ ބިލް، އެޖެންޑާއަށް އައުމުގެ މަގުމަތީގައިވަނިކޮށްވެސް އެއަށް ސަރުކާރުން އިސްލާހު ހުށަހަޅާ ކަމަށެވެ. އަދި އެހެން ވުމުން ބިލަށް ތާއީދުކޮށް ވާހަކަ ދައްކާނީތޯ ނުވަތަ އަސްލު ބިލު އަންނަންދެން މަޑު ކުރާނީތޯ އިމްތިޔާޒް ސުވާލު އުފެއްދެވިއެވެ.
ސަރުކާރުގެ ފަރާތުން ކެޔޮދޫ ދާއިރާގެ މެންބަރު މެދުވެރިކޮށް ފޮނުއްވާފައިވާ ފަނޑިޔާރުންގެ ގާނޫނަށް ހުށަހަޅާފައިވާ އިސްލާހުތަކަށް ދެވަނަ ފަހަރަށް އިސްލާހު ފޮނުވާފައިވަނީ ފުރަތަމަ ފޮނުވި އިސްލާހުތަކަމަށް މަޖިލީހުގައި ބަހުސް ކުރަން ފެށުމުގެ ކުރިންނެވެ.
މީގެ އިތުރުން ސަރުކާރުގެ ފަރާތުން ހެއްކާ ބެހޭ ގާނޫނަށްވެސް އިސްލާހުތައް ހުށަހަޅާފައިވަނީ އެ ގާނޫނަށް އަމަލު ކުރަން ފެށުމުގެ ކުރިންނެވެ.
