ފުލުހުން ކޮށްފައިވާ އިއުލާންގައި ވާގޮތުން، އެ ރުފިޔާ ފެނިފައިވަނީ، މިމަހުގެ 14 ވަނަ ދުވަހުގެ ރޭ 12:04 އެހައިކަންހާއިރު ބޮޑުތަކުރުފާނު މަގު، 1 ނަމްބަރު ފާލަން ހިމެނޭ ސަރަހައްދުން ނެވެ.
އެ ފައިސާ އާންމު ފަރާތަކުން ހޮވައިގެން ގެނެސް ފުލުހުންނާ ހަވާލުކޮށްފައިވާއިރު، ހުދުކުލައިގެ ސިޓީއުރައެއްގައި ހުރި 10،000 އަށްވުރެ ގިނަ ރުފިޔާ ފުލުހުންގެ ބެލުމުގެ ދަށުގައި އެބަހުރި ކަމަށް ފުލުހުން މިއަދުކުރި އިއުލާންގައި ވެއެވެ.
އެ ފައިސާތަކުގެ ވެރިފަރާތް ހޯދުމަށް މިހާތަނަށް ފުލުހުންކުރި މަސައްކަތުން ވެރިފަރާތް ހޯދިފައެއް ނުވެއެވެ. އެހެންކަމުން އެ ފައިސާތަކުގެ ވެރިފަރާތުން، ގަލޮޅު ޕޮލިސް ސްޓޭޝަނަށް ހާޒިރުވެ ފައިސާތަކާ ހަވާލުވުމަށް ފުލުހުން ވަނީ އެދިފައެވެ.
އެ ފައިސާ އާއި ގުޅޭ އިތުރު މައުލޫމާތު ހޯދުމަށް 9631696 އަށް ގުޅުއްވުމަށް ފުލުހުން ވަނީ އެދިފައެވެ.
އާންމު މީހަކަށް މަގުމަތީން ފެނުނު 10،000 އަށްވުރެ ގިނަ ރުފިޔާ ފުލުހުންނާއި ހަވާލުކޮށްފައިވާއިރު، 2020 ވަނަ އަހަރުގެ ތެރޭ އައްޑޫ ސިޓީގައި ދިރިއުޅޭ ބިދޭސީއަކު އެސިޓީގެ މަގެއްގެ މަތިން 100،000 ރުފިޔާ ހޮވާފައި ވެއެވެ. އެ ރުފިޔާތައްވެސް އޭނާ ވަނީ ފުލުހުންނާއި ހަވާލުކޮށްފައެވެ. ފަހުން އޭގެ ވެރިފަރާތަށް އެތަކެތި ރައްދުކޮށްދީފައިވެސް ވެއެވެ.
