މަހިބަދޫ މެންބަރު ތޯރިގު މަޖިލީހަށް، ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރަށް، ޗާގޮސް އާއި ރާއްޖޭގެ ކަނޑުގެ ސަރަހައްދު ފުށުއަރާ މައްސަލައާ ގުޅިގެން ފޮނުއްވޮ ސިޓީ ރައްޔިތުންގެ މަޖިލީހަށް ހޯދަން އެދިވަޑައިގެން ފޮނުއްވި ސިޓީގައި ވިދާޅުވީ ރާއްޖެއިން ޒަމާނުއްސުރެ ދަމަހައްޓަމުން އަންނަ ސްޓޭންޑް ބަދަލު ކުރުމުގެ ސަބަބުން ރާއްޖޭގެ ހާއްސަ އިގްތިސާދީ ސަރަހައްދުން ބައެއް އުނިވެގެން ދާނެ ކަމަށާއި އެއީ ގާނޫނުއަސާސީގެ ތިން ވަނަ މާއްދާ އިން ކަނޑައަޅާފައިވާ ރާއްޖޭގެ ސަރަހައްދަށް ބަދަލު އަންނާނެ ފަދަ ހާލަތެއް ކަމަށް ދެކެވަޑައިގަންނަވާތީ ރައީސް ފޮނުއްވި ސިޓީ ރައްޔިތުންގެ މަޖިލީހުގެ ކަމާބެހޭ ކޮމިޓީ އަށް ގެންނަވައި އެ މައްސަލަ ބައްލަވައި ދެއްވުން އެދޭ ކަމަށެވެ.
ކަނޑުގެ ސަރަހައްދު ފުށުއަރާ މައްސަލާގައި ބައިނަލްއަގުވާމީ ޓްރައިބިއުނަލްގައި މޮރިޝަސްގެ ފަރާތުން ރާއްޖެއާ ދެކޮޅަށް މައްސަލައެއް ހުށަހަޅާފައި ވަނިކޮށް، މޮރިޝަސް އަށް ޗާގޮސް ސަރަހައްދުގެ ސިޔާދަތީ ބާރު ލިބިގެންވާ ކަން ރާއްޖެއިން ގަބޫލުކޮށް މޮރިޝަސްގެ ބޮޑުވަޒީރަށް ސިޓީއެއް ފޮނުވާފައިވާ އެންމެ ކުރިން ހާމަ ކުރެއްވީ އެޓާނީ ޖެނަރަލް އިބްރާހިމް ރިއްފަތު ބައިނަލްއަގުވާމީ ޓްރައިބިއުނަލްގައި ވާހަކަ ދައްކަވަމުންނެވެ.
