އޮލިމްޕަސް އެންމެ މިޒަމާނުގެ ވަސީލަތްތަކާއިއެކު ވަރަށް އަވަހަށް ހުޅުވިގެންދާނެ ކަމަށް ވަކިވަކި ތާރީހުތައް ދެއްވަމުން ގެންދަވާތީ ފިލްމު އުފެއްދުމަށް އިންވެސްޓުކޮށް އެކަން ކުރައްވަމުން ގެންދަވާ ފަރާތްތަކަށް ބޮޑެތި ގެެެއްލުންތަކެއް ވަމުންދާ ކަމުގެ ކަންބޮޑުވުން މަަކުނުދޫ ދާއިރާގެ މެމްބަރު މުހައްމަދު ރާއީ މިއަދުގެ މަޖިލީހުގައި ފާޅުކުރެއްވި އެވެ.
އެ މަސައްކަތް ނުނިމިގެން އުޅެނީ ކީއްވެތޯ މެމްބަރު ރާއީ މިއަދުގެ މަޖިލީހުގައި މިނިސްޓަރު ޔުމްނާ އާއި ސުވާލުކުރެއްވި އެވެ. ޖަވާބުގައި މިނިސްޓަރު ވިދާޅުވީ، އެ މަސައްކަތް ވަރަށް ބޮޑަށް ލަސްވެފައި އޮތްކަން އެކަމަނާ އަށް ވެސް ގަބޫލުކުރެވޭ ކަމަށާއި، މަސައްކަތް ލަސްވެގެން ދިޔައީ ބައެއް ސާމާނު ގެންނަން ހަވާލުކުރި ފަރާތުން ފަހުން އެމަސައްކަތް ނުކުރެވޭނެ ކަމަށް އެންގުމުން ކަމަށެވެ.
ތަކެތި ލިބުމުގައި ހުރި ދަތިތަކާއި ގުޅިގެން މަސައްކަތް ލަސްވި ނަމަވެސް ޑިސެމްބަރު 16 އަށް އޮލިމްޕަސް ހުޅުވޭނެ ކަމަށް މިނިސްޓަރު ވިދާޅުވި އެވެ.
އޮލިމްޕަހުގައި ހުންނާނެ ޒަމާނީ ވަސީލަތްތައް
- ފިލްމް ސްކްރީން ކުރުމަށް ޑިޖިޓަލް ސިނެމާ ޕްރޮޖެކްޓަ
- ރިޓްރެކްޓް ކުރެވޭ ސިނެމާ ސްކްރީން
- މިއުޒިކް އަދި އިވެންޓުތަކަށް ބޭނުންވާ ސައުންޑް އަދި ލައިޓިން
- މިއުޒިކް ޕްރެކްޓިސް 2 ރޫމް
- ޑާންސް ޕްރެކްޓިސް އަށް 1 ރޫމް
- އޮލިމްޕަހުގެ އެތެރޭގައި ގާއިމުކޮށްފައިވާ ކެފޭ
- އިޝްތިހާރުކުރުމަށް ލެޑް ސްކްރީން
