މިގޮތުން 2013 ވަނަ އަހަރު ބޮޑު ހިޓެއް ހޯދި "އާޝިކީ 2" ގައި އެކުގައި މަސައްކަތްކުރި މި ދެ ތަރިން އަލުން ބައްދަލުވާ މަންޒަރު ފެންނާނެކަމުގެ ހަބަރާއެކު ފޭންސްގެ ޝައުގުވެރިކަންވަނީ އިތުރުވެފައެވެ.
މި ޕްރޮޖެކްޓާ ގުޅޭގޮތުން މަޝްވަރާތައް ކުރިއަށްދާއިރު، އަދި ރަސްމީކޮށް އެއްވެސް އިއުލާނެއް ކުރެވިފައެއް ނުވެއެވެ. ޝްރަދާގެ "ގާލް ނެކްސްޓް ޑޯ" ޝަހުސިއްޔަތާއި އަދިތިޔާގެ ސީރިއަސް އެކްޓިން ސްޓައިލް އެކުވުމުން ބޮލީވުޑްގެ އަނެއް ހިޓް ލަވްސްޓޯރީއެއް ފެނިގެންދާނެކަމަށް ގިނަ ބަޔަކު އުންމީދުކުރެއެވެ. ސޯޝަލް މީޑިއާގައި ފޭންސް "އާޝިކީ 2" ގެ ހަނދާންތައް ހިއްސާކުރަމުންދާއިރު، މި ދެ ތަރިންގެ ކެމިސްޓްރީ އަލުން ފެނުމަށް ގިނަ ބަޔަކު އިންތިޒާރުކުރަމުންދެއެވެ.
ޝްރަދާ ކަޕޫރުގެ 2025 ވަނަ އަހަރުގެ ޕްލޭންތަކުގައި ހިމެނެނީ ހަމައެކަނި ލޯބީގެ ފިލްމެއް ނޫނެވެ. "ސްޓްރީ 2" ގެ ކާމިޔާބީއަށްފަހު، އޭނާ "ތުމްބާޑް" ޑައިރެކްޓަރު ރާހީ އަނިލް ބާވޭއާއެކު ހޮރަރ ފިލްމެއްގައިވެސް މަސައްކަތްކުރާނެކަމަށް ބުނެވެއެވެ. މި ޕްރޮޖެކްޓް ޕްރޮޑިއުސްކުރާނީ އެކްތާ ކަޕޫރެވެ. ހޮރަރ-ކޮމެޑީ އާއި ސީދާ ހޮރަރ ޖާނަރގައި ޝްރަދާގެ ކާމިޔާބީ އިތުރަށް ފުޅާވެގެންދާނެކަމަށް ބެލެވެއެވެ.
