މަޖިލީހުގެ ބަޖެޓް ކޮމިޓީން ދިރާސާކޮށް އެކުލަވައިލި ރިޕޯޓަށް ބަހުސް ކުރެއްވުމަށް ފުރުސަތު އަރުވަމުން ރައީސް ނަޝީދު މިއަދު ވިދާޅުވީ ރާއްޖޭގެ ރައްޔިތުންގެ އަސާސީ ކަންކަން ފުރިހަމަ ކުރުމަށް ބޭނުންވާ ފައިސާ މިހާރު ދައުލަތުގެ ރިޒާވުގައި ނެތް ކަމަށެވެ. އަދި އެކަން އެހެން ގޮތަކަށް ބަދަލު ކޮށްގެން މަޖިލީހުގެ މެންބަރުން ވާހަކަފުޅު ނުދެއްކުމަށް އެދޭ ކަމަށް ރައީސް ނަޝީދު ވިދާޅުވި އެވެ.
އަދި ދައުލަތުގެ ރިޒާވް ގައި ފައިސާ ހުރި ކަމަށް ބުނުމަކީ ކަނޑައެޅިގެން ރައްޔިތުންނަށް ވެވޭ އޮޅުވާލުމެއް ކަމަށްވެސް ރައީސް ނަޝީދު ވަނީ ވިދާޅުވެފަ އެވެ.
މީގެ އިތުރުން ރައީސް ނަޝީދު ވިދާޅުވީ، ދައުލަތުގެ ފޮރިން ރިޒާވް ގައި ހުރި ބޭރު ފައިސާގެ އަދަދު ވެސް ހުރީ ވަރަށް މަދުވެފައި ކަމަށާއި، މިކަންކަމަކީ ރައްޔިތުންނަށް އެނގެންޖެހޭ ކަންތައްތައް ކަމަށެވެ.
ސަރުކާރުން އަންނަ އަހަރަށް ލަފާކުރި ބަޖެޓުގެ ބަހުސް މިހާރު ކުރިއަށްދާއިރު، މި ބަޖެޓާއި ގުޅިގެން ރައީސް ނަޝީދު ގެންދަވަނީ ކަންބޮޑުވުން ފާޅުކުރަމުންނެވެ.
