މިއަދު ފާހަގަކުރަމުން އަންނަ ނަރުހުންގެ ދުވަހުގެ މުނާސަބަތުގައި "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ ނަރުހުން ހިދުމަތުގެ އެންމެ ކުރީ ސަފުގައި ތިބެ އަދާކުރަނީ ގައުމީ ވާޖިބެއް ކަމަށެވެ. އަދި އެއީ އިންސާނިއްޔަތުކަމުގެ އަގުހުރި ޒިންމާއެއްގެ ގޮތުގައި ރައީސް ސިފަކުރެއްވި އެވެ.
އިންޓަނޭޝަނަލް ކައުންސިލް އޮފް ނަސަސްއިން މި އަހަރުގެ ނަރުހުންގެ ދުވަހުގެ ޝިއާރެއްގެ ގޮތުގައި ކަނޑައަޅާފައި ވަނީ "އަވަ ނަސަސް، އަވަ ފިއުޗަ. ދަ އިކޮނޮމިކް ޕަވަ އޮފް ކެއަ" އެވެ. މިއީ ސިއްހީ ނިޒާމުގެ މައިބަދައިގެ ގޮތުގައި ގިނަ ބަޔަކު ދެކޭ ނަރުހުންނަށް ހިދުމަތުގެ ތެރޭގައި މާލީގޮތުން ދިމާވާ އެކި ގޮންޖެހުންތަކާ މެދު ވިސްނައި އެ ކަންކަމަށް އެދެވޭ ފިޔަވަޅުތަކެއް އަޅަން ބާރުއެޅުމުގެ ގޮތުން ކަނޑައަޅާފައިވާ ޝިއާރެކެވެ.
ކޮންމެ އަހަރެއްގެ މެއި މަހުގެ 12 ވަނަ ދުވަސް ފާހަގަކުރަނީ ދުނިޔޭގެ ނަރުހުންގެ ދުވަހުގެ ގޮތުގަ އެވެ. މި ދުވަސް ފާހަގަކުރަނީ އިންސާނިއްޔަތަށްޓަކައި ނަރުހުން ވަމުންދާ ގުރުބާނީ އާއި އެމީހުންގެ ހިދުމަތް ދުނިޔޭގެ ފެންވަރުގައި ފާހަގަކޮށް އެކަމުގެ އަގުވަޒަން ކުރުމުގެ ގޮތުންނެވެ.
