މިއީ ޖުޑީޝަލް ސާވިސް ކޮމިޝަނާ އިންޑިޔާގެ ޖުޑީޝަރީގެ ކަމާގުޅޭ ދާއިރާތަކާއެކު ވެވުނު އެއްބަސްވުންތަކުގެ ތެރެއިން ދިވެހި ފަނޑިޔާރުން ތަމްރީން ކުރުމަށް ހިންގާ ޕްރޮގްރާމެކެވެ. ބެލެވޭ ގޮތުގައި މިއީ އެއް ފަހަރާ ފަނޑިޔާރުންގެ އެންމެ ބޮޑު ވަފްދެއް ރާއްޖޭން ބޭރަށް ދާނެ ފަހަރެވެ. މި ޕްރޮގްރާމްގައި ފަންސާހަކަށް ފަނޑިޔާރުން ބައިވެރިވާނެ ކަމަށް މައުލޫމާތު ލިބިފައިވެއެވެ. ތަމްރީން އޮންނާނެ ކަމަށް މައުލޫމާތު ލިބިފައިވަނީ އިންޑިޔާގެ ޖުޑީޝަލް އެކަޑަމީގައެވެ.
ޖުޑީޝަލް ސަރވިސް ކޮމިޝަނާއި އިންޑިޔާގެ މިނިސްޓްރީ އޮފް ލޯ އެންޑް ޖަސްޓިސްއާ ދެމެދު މީގެ ދުވަސްކޮޅެއް ކުރިން މެމަރަންޑަމް އޮފް އަންޑަރސްޓޭންޑިންގ (އެމް.އޯ.ޔޫ) އެއްގައި ސޮއިކުރައްވާފައިވެއެވެ. އަދި 2020 ވަނަ އަހަރުވެސް ދިވެހިރާއްޖޭގެ ފަނޑިޔާރުން ތަމްރީނުކުރުމުގެ ގޮތުން ޖުޑީޝަލް ސަރވިސް ކޮމިޝަނާއި އިންޑިޔާގެ ނޭޝަނަލް ޖުޑީޝަލް އެކަޑެމީއާ ދެމެދު ވަނީ އެމް.އޯ.ޔޫ އެއްގައި ސޮއި ކުރައްވާފައެވެ. މި އެއްބަސްވުންތަކުގެ ސަބަބުން ދިވެހިރާއްޖޭގެ ޝަރުއީ ދާއިރާގައި މަސައްކަތް ކުރާ ގިނަ ފަރާތްތަކަށް ފަންނީ ތަމްރީނާއި، ތަޖުރިބާ އިތުރުކުރުމުގެ ތަފާތު ފުރުސަތުތަކެއް ލިބިގެންދާނެއެވެ.
