ގައުމީ މަޖިލީހަށް މެންބަޝިޕް ސާފު ކުރުމުގެ ގަރާރު ހުށަހެޅުމުގެ ކުރިން އެމަޖިލިސް މެންބަރުންނަށް ހިއްސާކުރި ލިޔުމެއް މިއަދު އިބްރޭ ހިއްސާ ކުރެއްވި އެވެ. އޭގައި އީސީގެ ދަފްތަރާއި އެ ޕާޓީގެ ދަފްތަރާއި އަޅާ ކީ އިރު ހޯދުނު ހޯދުންތައް ފާހަގަކޮށްފައިވެ އެވެ.
އޭރު އެމްޑީޕީގެ ދަފްތަރުގައި 93،000 މެންބަރުން ތިބި ކަމަށް ދައްކާއިރު، އެމީހުންގެ ތެރެއިން 17،156 މީހުންނަކީ އެހެން ޕާޓީތަކުގެ މެމްބަރުން ކަމަށް އީސީގެ ދަފްތަރުގައި ފާހަގަކޮށްފައިވާ މީހުން ނެވެ. އަދި 24،033 މީހުންނަކީ އީސީގެ ދަފްތަރުން ބަލާއިރު އެއްވެސް ޕާޓީއަކަށް ނިސްބަތް ނުވާ މީހުން ނެވެ.
އީސީގެ ދަފްތަރުން ދައްކާގޮތުގައި އެމްޑީޕީ ދަފްތަރުގައި އޭރު ތިބި 17،000 މެމްބަރުންނަކީ:
- އަދަލާތު ޕާޓީ: 1،211 މެންބަރުން
- ޑީއާރުޕީ:389 މެންބަރުން
- ޖުމްހޫރީ ޕާޓީ: 3،788 މެންބަރުން
- އެމްޑީއޭ:1،762 މެންބަރުން
- އެމްއެސްއެލްޑީޕީ: 875
- އެމްއާރުއެމް:1،029 މެންބަރުން
- ޕީއެންސީ: 698 މެންބަރުން
- ޕީޕީއެމް: 6،357 މެންބަރުން
މި ލިޔުން އިބްރޭ ހާމަކޮށްފައި މިވަނީ، ދަފްތަރު އޮތީ ވަރަށް ބޮޑަށް ގަޑުބަޑު ވެފައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައި ވަނިކޮށެވެ.
އަންނަ 2023 ވަނަ އަހަރުގެ ރިޔާސީ އިންތިހާބުގެ އެމްޑީޕީ ޕްރައިމަރީގައި ވާދަ ކުރައްވާނެކަން ހާމަކުރައްވާ އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއީލަށް ނަޝީދު ފޮއްނުވި ސިޓީއެއްގައި ވަނީ އެމްޑީޕީގެ ވޯޓުލާ ދަފްތަރުން 40 ހާހެއްހާ މެމްބަރުން، އެ މެމްބަރުންނަށް އެނގުމަކާއި ނުލާ ކުއްލިއަކަށް އުނިކުރުމުން އެ ދަފްތަރު މިހާރު ވަނީ ވަރަށް ބޮޑަށް ގަޑުބަޑު ވެފައި ކަމަށެވެ. އެހެން ކަމުން ދަފްތަރު އެގޮތަށް އޮވެ ބާއްވާ ޕްރައިމެރީއެއް އިންސާފުވެރި، އަދި މިނިވަން ޕްރައިމެރީއަކަށް ވާނެ ކަމަށް އެމަނިކުފާނަށް ގަބޫލުފުޅު ނުކުރެއްވޭ ކަމަށް ސިޓީގައި ވަނީ ވިދާޅުވެފަ އެވެ.
