މިއަދު ކްރިމިނަލް ކޯޓުގައި ބޭއްވި އަޑުއެހުމުގައި މަނީ ލޯޑަރިންނާއި، ރިޝްވަތު ގަބޫލުކުރުމުގެ ދައުވާ ސާބިތުވާ ކަމަށް ނިންމާ، ފަސް މިލިއަން ޑޮލަރު( 77 މިލިއަން ރުފިޔާ) ގެ ޖޫރިމަނާ އަކާއިއެކު 11 އަހަރުގެ ޖަލު ހުކުމެއް ރައީސް ޔާމީން މައްޗަށް ވަނީ އިއްވާފަ އެވެ.
އެމަނިކުފާނަކީ އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓެވެ. ޔާމީންގެ ގާނޫނީ ވަކީލުންގެ ޓީމުން ބުނީ، އެ ހުކުމް ވީހާވެސް އަވަހަށް އިސްތިއުނާފް ކުރާނެ ކަމަށާއި، ސްޕްރީމު ކޯޓުން އެ މައްސަލާގައި އިންސާފު ލިބޭނެކަމުގެ ޔަގީންކަން އެބައޮތް ކަމަށެވެ.
އަދި އިދިކޮޅު ޕީޕީއެމް/ ޕީއެންސީ ކޯލިޝަނުން ބުނީ، އެ ޕާޓީގެ ރިޔާސީ ކެންޑިޑަސީ ބަދަލު ނުވާނެ ކަމަށާއި، ރައީސް ޔާމީން ނޫން ދެވަނަ ވިސްނުމެއް ނެތް ކަމަށެވެ.
11 އަހަރުގެ ޖަލު ހުކުމް ތަންފީޒުކުރުމަށް ރައީސް ޔާމީން މިރޭ މާފުށީ ޖަލަށް ގެންދިޔައިރު، މިއީ ޔާމީން ތަންފީޒު ކުރައްވާ ދެވަނަ ހުކުމެވެ.
މީގެ ކުރިން ގއ. ވޮޑަމުއްލާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ 2019 ވަނަ އަހަރުގެ ނޮވެމްބަރު 28 ވަނަ ދުވަހު ފަސް އަހަރުގެ ޖަލު ހުކުމެއް ކްރިމިނަލް ކޯޓުން ޔާމީންގެ މައްޗަށް އިއްވި އެވެ. ނަމަވެސް 2021 ވަނަ އަހަރުގެ ނޮވެމްބަރު 30 ވަނަ ދުވަހު ސުޕްރީމް ކޯޓުން އެހުކުމް ބާތިލުކޮށް ޔާމީން މިނިވަން ކުރި އެވެ.
