މިހާރު ބާއްވަމުންދާ ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުރަހީމް އަބްދުﷲ ވިދާޅުވީ، މިއަދު އިއްވީ ނިހާއީ ހުކުމެއް ކަމަށާއި، އިސްތިއުނާފީ ދެ މަރުހަލާ އަދި އެބައޮތް ކަމަށެވެ.
އެހެންކަމުން ރައީސް ޔާމީންްގެ ރިޔާސީ ކެންޑިޑަސީ ބާތިލުވާނެ އެއްވެސް ގޮތެއް އަދި ނެތް ކަމަށް އަދުރޭ ވިދާޅުވި އެވެ.
ރާއްޖޭގެ ފަނޑިޔާރުންގެ ތެރޭގައި ވެސް ގައުމުދެކެ ލޯބިވާ، އިންސާފަށް ހުކުމް ކުރައްވާނެ ފަނޑިޔާރުން ތިއްބަވާނެކަން ފާހަގަކުރައްވާ އަދުރޭ ވިދާޅުވީ މަތީ މަރުހަލާގެ ކޯޓުތަކުން ޔާމީން އާއި އެއްކޮޅަށް މައްސަލަ ނިމޭނެ ކަމުގެ ޔަގީންކަން އެބައޮތް ކަމަށެވެ.
އަދުރޭ ވިދާޅުވީ، ޔާމީން ޖަލަށް ލައިގެން ޕީޕީއެމް ޕީއެންސީ ކޯލިޝަން ބައިބައި ކޮށްލެވޭނެ ކަމަށް ގަބޫލުކުރުމަކީ ގޯހެއް ކަމަށާއި، ޔާމީންގެ މައްޗަށް ހުކުމް އިއްވިޔަސް އެ ޕާޓީގެ ރިޔާސީ ކެންޑިޑޭޓަކީ ހަމައެކަނި ޔާމީން ކަމަށެވެ.
ޔާމީން ޖަލަށް ލައިފިނަމަ ޕީޕީއެމްއިން އެހެން ޕާޓީއަކާއިއެކު ކޯލިޝަން ހަދާނެތޯ އާއި، ޕީޕީއެމް ޕީއެންސީ ކޯލިޝަނުގެ ތެރެއިން ދެވަނަ ކެންޑިޑޭޓަކު ނެރޭނެތޯ ސުވާލު އިތުރަށް ނުކުރުމަށްވެސް އަދުރޭ އެދިވަޑައިގަތެވެ.
އަދި ތަކުރާރު ކުރެއްވީ، ޕީޕީއެމް/ޕީއެންސީ ތެރޭގައި ވެސް ޓިކެޓުގެ ޝައުގުވެރިކަން ހުރި އެއްވެސް މީހަކު ނެތްކަމަށާއި، 2023 ވަނަ އަހަރުގެ ރިޔާސީ ކެންޑިޑޭޓެއްގެ ގޮތުގައި އެ ކޯލިޝަންނުގެ ވޯޓު ކަރުދާހުގައި އޮންނާނީ ރައީސް ޔާމީންގެ ނަންފުޅު ކަމަށެވެ. އަދި 2023 ޔާމީންއަށް ކާމިޔާބު ވާނެ ކަމަށްވެސް އަދުރޭ ވިދާޅުވި އެވެ.
