ރައީސް ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަބްދުﷲ ޝިޔާޒް ވަނީ ހުކުމުގެ ލިޔުން މިހާރު ކްރިމިނަލް ކޯޓުން ހަވާލު ކޮށްފައިވާކަމަށް ވިދާޅުވެފަ އެވެ.
އެ ލިޔުން ނުލިބި ލަސްވުމުގެ ސަބަބުން އެމަނިކުފާނުގެ ވަކީލުންގެ އިތުރުން ޕީޕީއެމްގެ ލީޑާޝިޕުގެ ބޭފުޅުން ވަނީ މިއަދު ކްރިމިނަލް ކޯޓަށްވެސް ވަޑައިގެންފަ އެވެ.
އާއްމު ގޮތެއްގައި ކޯޓުން ހުކުމް ކުރުމަށްފަހު އެ ދުވަހަކު އެ ހުކުމް އެ ފަރާތްތަކާއި ހަވާލު ކުރެ އެވެ. އެހެން ނަމަވެސް ރައީސް ޔާމީންގެ މައްޗަށް އިއްވި ހުކުމުގެ ލިޔުން ހަވާލުނުކޮށް ލަސްވީ ކޮން ސަބަބަކާއި ހުރެ ކަމެއް ސާފެއް ނުވެ އެވެ.
މިކަމާއި ގުޅިގެން މީގެ ކުރިން ޑރ. ޖަމީލް ވިދާޅުވީ، ސްޕްރީމް ކޯޓްގެ ޕްރެކްޓިސް ޑައިރެކްޝަން ބުނާގޮތުންވެސް ހުކުމް އިއްވާ ދުވަހު ޝަރީއަތް ނިމުނުގޮތް/ރިޕޯޓް ދޭންޖެހޭ ކަމަށެވެ. އެހެން ނަމަވެސް އެ ލިބިފައި ނުވުމުން އިސްތިއުނާފް މަސައްކަތް ނުފެށި ލަސްވަމުން އަންނަ ކަމަށެވެ.
11 އަހަރުގެ ޖަލު ހުކުމް ތަންފީޒުކުރުމަށް ރައީސް ޔާމީން ރޭ މާފުށީ ޖަލަށް ގެންދިޔައިރު، މިއީ ރައީސް ޔާމީން ތަންފީޒު ކުރައްވާ ދެވަނަ ހުކުމެވެ.
މީގެ ކުރިން ގއ. ވޮޑަމުއްލާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ 2019 ވަނަ އަހަރުގެ ނޮވެމްބަރު 28 ވަނަ ދުވަހު ފަސް އަހަރުގެ ޖަލު ހުކުމެއް ކްރިމިނަލް ކޯޓުން ޔާމީންގެ މައްޗަށް އިއްވި އެވެ. ނަމަވެސް 2021 ވަނަ އަހަރުގެ ނޮވެމްބަރު 30 ވަނަ ދުވަހު ސުޕްރީމް ކޯޓުން އެހުކުމް ބާތިލުކޮށް ޔާމީން މިނިވަން ކުރި އެވެ.
