ކްރިމިނަލް ކޯޓުގައި އިއްޔެ ބޭއްވި އަޑުއެހުމުގައި މަނީ ލޯޑަރިންނާއި، ރިޝްވަތު ގަބޫލުކުރުމުގެ ދައުވާ ސާބިތުވާ ކަމަށް ނިންމާ، ފަސް މިލިއަން ޑޮލަރު( 77 މިލިއަން ރުފިޔާ) ގެ ޖޫރިމަނާ އަކާއިއެކު 11 އަހަރުގެ ޖަލު ހުކުމެއް ރައީސް ޔާމީން މައްޗަށް ވަނީ އިއްވާފަ އެވެ.
އެހެން ނަމަވެސް އަދިވެސް ޝަރީޢަތް ނިންމިގޮތުގެ ރިޕޯޓް ހަވާލު ކޮށްފައި ނުވާކަމަށް އެމަނިކުފާނުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވިއެވެ. އަދި ކްރިމިނަލް ކޯޓުން ޝަރީޢަތް ނިންމިގޮތުގެ ރިޕޯޓް ހަވާލު ނުކޮށް ލަސްވަމުން ދިއުމާއި ގުޅިގެން ޖަމީލުވަނީ ކަންބޮޑުވުން ފާޅު ކުރައްވާފަ އެވެ.
ޑރ. ޖަމީލް ކުރެއްވި ޓުވީޓެއްގައި ވިދާޅުވީ، ކްރިމިނަލް ކޯޓުން ރައީސް ޔާމީންގެ މައްޗަށް ބޮޑު ހުކުމެއް އިއްވާފައި ވާއިރު، އަދިވެސް ރިޕޯޓް ނުލިބޭ ކަމަށް ވިދާޅުވެފަ އެވެ. އަދި ހުކުމް ކުރުމަށް ބޭއްވި އަޑުއެހުންވެސް ފަސްވި ގޮތަށް ރިޕޯޓް ހަވާލު ކުރުންވެސް ފަސްވަމުން އަންނަ ކަމަށް އެމަނިކުފާނު ވިދާޅުވި އެވެ.
މީގެ އިތުރުން ޑރ. ޖަމީލް ވިދާޅުވީ، ސްޕްރީމް ކޯޓްގެ ޕްރެކްޓިސް ޑައިރެކްޝަން ބުނާގޮތުންވެސް ހުކުމް އިއްވާ ދުވަހު ޝަރީއަތް ނިމުނުގޮތް/ރިޕޯޓް ދޭންޖެހޭ ކަމަށެވެ. އެހެން ނަމަވެސް އެ ލިބިފައި ނުވުމުން އިސްތިއުނާފް މަސައްކަތް ނުފެށި ލަސްވަމުން އަންނަ ކަމަށެވެ.
11 އަހަރުގެ ޖަލު ހުކުމް ތަންފީޒުކުރުމަށް ރައީސް ޔާމީން ރޭ މާފުށީ ޖަލަށް ގެންދިޔައިރު، މިއީ ރައީސް ޔާމީން ތަންފީޒު ކުރައްވާ ދެވަނަ ހުކުމެވެ.
މީގެ ކުރިން ގއ. ވޮޑަމުއްލާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ 2019 ވަނަ އަހަރުގެ ނޮވެމްބަރު 28 ވަނަ ދުވަހު ފަސް އަހަރުގެ ޖަލު ހުކުމެއް ކްރިމިނަލް ކޯޓުން ޔާމީންގެ މައްޗަށް އިއްވި އެވެ. ނަމަވެސް 2021 ވަނަ އަހަރުގެ ނޮވެމްބަރު 30 ވަނަ ދުވަހު ސުޕްރީމް ކޯޓުން އެހުކުމް ބާތިލުކޮށް ޔާމީން މިނިވަން ކުރި އެވެ.
