މާޗް މަހުގެ ހަތަރަކުން އަށަކަށް ޖަރުމަނު ވިލާތުގެ ބާރލިންގައި ކުރިއަށް ގެންދިއުމަށް ހަމަޖެހިފައި އޮތް ފެއާ ކެންސަލްކޮށްލާފައި މިވަނީ މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އިން ރައްކާތެރިވުމުގެ ގޮތުންނެވެ.
މިއީ މިފެއާ ބާއްވަން ފެށުނު ފަހުން ފެއާ ކެންސަލް ކުރެވުނު ފުރަތަމަ ފަހަރެވެ. 1966 ވަނަ އަހަރުން ފެށިގެން މެދުނުކެޑި ކޮންމެ އަހަރަކު ބާއްވަމުން އަންނަ ފެއާ ކެންސަލްކޮށްލަން ނިންމި ނިންމުމަކީ އުދަނގޫ ނިންމުމެއްކަމަށާއި އެހެންނަމަވެސް މިވަގުތަކީ ފެއާއަށް ޒިޔާރަތް ކުރާ މީހުންނާއި ބައިވެރިން އަދި މުވައްޒަފުންގެ ސިއްހީ ސަލާމަތްތެރިކަން ކަށަވަރު ކުރަން ޖެހޭ ވަގުތު ކަމަށްވާތީ، ފެއާ ކެންސަލްކޮށްލަން ނިންމީ ކަމުގައި ފެއާ އިންތިޒާމްކޮށް ކުރިއަށް ގެންދާ މެސް ބާލިން އިން ވަނީ ބުނެފައެވެ.
މެސް ބާލީން އިން ވަނީ މިއަހަރުގެ ފެއާ ކެންސަލްކޮށްލި ނަމަވެސް 2021 ވަނަ އަހަރުގެ ފެއާގައި ގިނަ ފަރާތްތަކަކުން ބައިވެރިވާނެކަމަށް އުންމީދުކުރާ ކަމަށް ބުނެފައެވެ. އަންނަ އަހަރުގެ އައިޓީބީ ފެއާ ބޭއްވުމަށް ހަމަޖެހިފައި ވަނީ އެއަހަރުގެ މާޗް މަހު 10 އަކުން 14 އަށެވެ.
ދުނިޔޭގެ އެކި ކަންކޮޅުތަކުން 180 ގައުމުން 10،000 ފަރާތަކުން ބައިވެރިވާ މި ފެއާގައި މިއަހަރު ރާއްޖޭގެ ފަރާތުން 99 ކުންފުންޏަކުން 244 ފަރާތް ބައިވެރިވުމަށް ވަނީ ނިންމާފައެވެ. އަދި ފެއާގެ ބައިވެރިން ޖަރުމަނަށް ފުރަން ހަމަޖެހިފައި އޮތީ މިފެށޭ މާޗް މަހުގެ އެއް ވަނަ ދުވަހުއެވެ.
ޖަރުމަނުވިލާތުގެ ސަރުކާރުގެ އެންގުމުގެ މަތިން އައިޓީބީ ފެއާ ކެންސަލްކޮށްފައި ވާއިރު، މިހާތަނަށް ޖަރުމަނުން ކޮވިޑް-19 އަށް ޝައްކުކުރެވޭ 1،000 މީހުން ވަނީ ކަަރަންޓީނުކޮށްފައެވެ. އަދި ކޮވިޑް-19 އަށް ޕޮޒިޓިވެފައިވާ 60 މީހަކު އެގައުމުން ފެނިފައި ވާއިރު މީގެ ތެރެއިން ދެ މީހެއްގެ ހާލު ވަރަށް ސީރިއަސް ކަމަށް އެގައުމުގެ ހަބަރުފަތުރާ ވަސީލަތްތައް ރިޕޯޓްކުރެއެވެ.
ކޮވިޑް-19 ގެ ސަބަބުން ދުނިޔޭގެ އެކި ކަންކޮޅުތަކުގައި ބާއްވަމުން އަންނަ މިފަދަ ބޮޑެތި ފެއާތަކާއި އިވެންޓްތައް އަންނަނީ ކެންސަލްކުރަމުންނެވެ.
