އިކޮނޮމިކް މިނިސްޓްރީ އާއި މިފްކޯ ގުޅިގެން ހިންގުމަށް ހަމަޖެހިފައިވާ މި މަޝްރޫއުގެ މަސައްކަތް ކުރުމަށް ރައިނެކް އިންޑިއާ ލިމިޓެޑް އާއެކު މިފްކޯ އިން ސޮއިކޮށްފައިވަނީ ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީކުރުމުގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގެ ތެރޭގައެވެ.
އިންޑިއާގެ އެގްޒިމް ބޭންކުގެ ލޯނު ފައިނޭންސްގެ ދަށުން ކުރިޔަށް ގެންދިއުމަށް ހަމަޖެހިފައިވާ މި މަޝްރޫއަކީ:
- 23 މިލިއަން ޑޮލަރު (354 މިލިއަން ރުފިޔާ) ގެ މަޝްރޫއެއް
- ރައިނެކް ގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޕީ ސުކުމަރަން
- މިފްކޯގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އިސްމާއިލް ފައުޒީ
ފެލިވަރު ތަރައްގީ ކުުރުމުގެ މަޝްރޫއު ދައްކުވައިދޭ ކުރެހުމެއް - ފޮޓޯ:މިފްކޯ
މިފްކޯއިން ބުނި ގޮތުގައި އެ އެއްބަސްވުމުގެ ދަށުން:
- ފެލިވަރުގެ ކޯލްޑް ސްޓޯރޭޖް 4،000 ޓަނަށް ބޮޑުކުރުމުގެ މަސައްކަތް ކުރާނެ
- ދުވާލަކު 200 ޓަނުގެ މަސް ފްރީޒް ކުރެވޭ ބްރައިން ފްރީޒިން ފެސިލިޓީއެއް ގާއިމުކުރާނެ
- މަސް ފިނިކޮށް ބަހައްޓާ 80 ޓަނުގެ ރެފްރިޖަރޭޓަޑް ސީ ވޯޓަ ސިސްޓަމެއް ގާއިމުކުރާނެ
- ގއ. ގެމަނަފުށީގައި 50 ޓަނުގެ ބްލޮކް އައިސް ޕްލާންޓަކާއި 100 ޓަނުގެ އައިސް ސްޓޯރޭޖެއް ގާއިމު ކުރާނެ
މި މަޝްރޫއާ އެކު، މިފްކޯގެ ކޯލްޑް ސްޓޯރޭޖް ކެޕޭސިޓީ މިހާރަށް ވުރެ 48 އިންްސައްތަ އިތުރުވާނެއެވެ. އެ އާއެކު، ކޯލްޑް ސްޓޯރޭޖް ވެގެންދާނީ ރާއްޖޭގައި މިހާތަނަށް ގާއިމުކުރެވޭ އެންމެ ބޮޑު ކޯލްޑް ސްޓޯރޭޖަށެވެ. މި މަޝްރޫއުގެ ސަބަބުން އެ ކުންފުނީގެ ފްރީޒިން ކެޕޭސިޓީ މިހާރަށް 37 އިންސައްތަ އިތުރުވާނެއެވެ.
މި މަޝްރޫއުގެ ތެރޭގައި ހިމެނޭ ވަސީލަތްތައް ގާއިމުކުރުމަށް ހަމަޖެހިފައިވަނީ އެކަމަށް ފެލިވަރުގެ ފަޅުން ހިއްކާފައިވާ 5.7 ހެކްޓަރުގެ ބިމުގެ ސަރަހައްދެއްގައެވެ. މި ބިމާ އެކު މުޅިން އަލަށް އެކްސްޕޯޓް ޖެޓީއަކާއި މަސްކިރާ ޖެޓީއެއްގެ އިތުރުން ފެލިވަރުގެ އާންމު ބޭނުންތަކަށް ބޭނުންވާ ޖެޓީއެއް ގާއިމުކުރުމުގެ މަސައްކަތް ދަނީ ކުރަމުންނެވެ. އިކޮނޮމިކް މިނިސްޓްރީން ބުނެފައިވަނީ މި މަސައްކަތްތަކުގެ 85 އިންސައްތަ މިހާރު ނިމިފައިވާ ކަމަށެވެ.
މި މަޝްރޫއުގެ ދަށުން 40 ޓަނުގެ ފިޝްމީލް ޕްލާންޓެއް ފެލިވަރުގައި ގާއިމުކުރުމަށް ނިންމާފައިވާއިރު، މިފްކޯއިން ގަންނަމަހުގެ ބޮޑުބައެއް ވެލިއު އެޑްކޮށްގެން އެކްސްޕޯޓްކުރުމުގެ ފުރުސަތު ވެސް ހުޅުވިގެންދާނެއެވެ. ފެލިވަރުގައި 100 ޓަނުގެ މަސް ޕްރޮސެސްކުރާ ފެކްޓަރީއެއް ގާއިމުކުރުމުގެ މަސައްކަތްކުރާނެ ފަރާތެއް ހޯދުމަށް ބީލަން ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.
