ދިވެހި ދެ މުވައްޒަފެއްގެ މުސާރައިން އުނިކުރި ބައި ދޭން ޖާހް ކުންފުނީގެ މައްޗަށް ވަޒީފާއާ ބެހޭ ޓްރައިބިއުނަލުން ހުކުމް ކުރިއިރު، ހިޔާނާތާއި، މަކަރާއި ހީލަތް އަދި ޓެކުމުގެ ކުށާއި ގުޅޭ މައްސަލަތަކެއް ތަހުގީގުކޮށްދިނުމަށް، ޖާހް ކުންފުންޏާ ދެކޮޅަށް މަޝްހޫރު ގާނޫނީ ވަކީލު މަރިޔަމް ޝުނާނާގެ ލޯފާމުން މިދިޔަ ހަފްތާގައިވަނީފުލުސް އޮފީހަށާއި އެންޓި ކޮރަޕްޝަން ކޮމިޝަނަށް މައްސަލަ ހުށަހަޅާފައެއެވެ.
ދިވެހި ދެ މުވައްޒަފެއްގެ މުސާރައިން އުނިކުރި ބައި ދޭން ޖާހް ކުންފުނީގެ މައްޗަށް ވަޒީފާއާ ބެހޭ ޓްރައިބިއުނަލުން ހުކުމްކުރީ މިދިޔަ ހަފްތާގައެވެ. އެއީ އެ ކުންފުނީގެ އެސިސްޓަންޓް ޝޯރޫމް މެނޭޖަރުގެ މަގާމުގައި ތިބި ދެ މުވައްޒަފެއްގެ މުސާރައިން އުނި ކުރި މައްސަލައެކެވެ. މި މައްސަލައިގައި އެއިން ކޮންމެ މުވައްޒަފަކަށް ބައިލައްކައެއްހާ ރުފިޔާ އެއް މަސް ދުވަހުގެ ތެރޭގައި ދޭން ޖާހް ކުންފުނީގެ މައްޗަށް ހުކުމްކޮށްފައިވެއެވެ.
މުވައްޒަފުންގެ މުސާރައިން އުނި ކުރި މައްސަލަ ފެންމަތިވެ، ހުކުމެއް އައިއިރު، ހިޔާނާތާއި، މަކަރާއި ހީލަތް އަދި ޓެކުމުގެ ކުށާ ގުޅޭ މައްސަލަތަކެއް ތަހުގީގުކޮށްދިނުމަށް، ޖާހް ކުންފުންޏާ ދެކޮޅަށް ޝުނާނާގެ ލޯފާމުން ފުލުސް އޮފީހަށާއި އެންޓި ކޮރަޕްޝަން ކޮމިޝަނަށް މައްސަލަ ހުށަހަޅާފައިވަނީ އެ ލޯފާމުގެ 13 މުވައްކިލެއްގެ ފަރާތުން މިދިޔަ ބުދަ ދުވަހުއެވެ.
ޖާހު އަކީ ކުރިން ޖައުސާގެ ނަމުގައި ހިންގަމުން އައި ކުންފުންޏެވެ. ޖައުސާގެ ނަމުގައި ޑިސެމްބަރު 18، 1994 ގައި އުފެއްދި މި ކުންފުނީގެ ނަން "ޖާހު"އަށް ރީބްރޭންޑް ކޮށްފައި ވަނީ މީގެ ފަސް ވަރަކަށް އަހަރު ކުރިންނެވެ. އެ ކުންފުނިން ވަނީ ރާއްޖޭގެ އެންމެ ކާމިޔާބު ކުންފުނިތައް ފާހަގަކޮށް ކޮންމެ އަހަރަކު ދެމުން އަންނަ "ގޯލްޑް ހަންޑްރެޑް" އެވޯޑު ޖެހިޖެހިގެން ތިން އަހަރު ހާސިލް ކޮށްފަ އެވެ.
