ރައީސް ޔާމީންގެ ވަކީލުންގެ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި ވަކީލުން ވިދާޅުވީ، މައްސަލާގައި ހިމެނޭ ބައެއް ލިއުންތައް ކޯޓަށް ހުށަހަޅާފައި ނެތްކަން އެ މައްސަލަ ޓީމުން ދިރާސާކުރި ފާހަގަކުރެވިފައިވާ ކަމަށެވެ.
އެހެންވެ، ގާނޫނީ ޓީމުން އެމައްސަލަ އިސްތިއުނާފު ކުރުމަށް މަސައްކަތްކުރަމުންދަނީ އަތުޖެހެން އެފަދަ ހުރި ހުރިހާ ލިއުމެއް އެކި ދިމަދިމާއިން ހޯދައިގެން ކަމަށް ވަކީލު ވިދާޅުވި އެވެ.
ޔާމީންގެ މައްޗަށް ހުކުމު ކުރެވުނު ދުވަހު ބޭއްވި ވަކީލުންގެ ބައްދަލުވުމުގައި ވަކީލުން ފާހަގަކުރީ ވީހާވެސް އަވަހަކަށް އެމައްސަލަ އިސްތިއުނާފު ކުރާނެ ކަމަށެވެ. ނަމަވެސް އެމައްސަލަ އިސްތިއުނާފު ކުރުން ލަސްވަމުންދިއުމުން އުފެދުނު ކަންބޮޑުވުންތަކަށް ވަކީލުންގެ ޓީމުން ދެއްކި އުޒުރަކީ ހުކުމްގެ ޝަރީއަތް ނިމުނު ގޮތުގެ ރިޕޯޓާ އެކު މަހުޟަރު ބަޔާންތައް ކޯޓުން ހަވާލުކޮށްފައި ނުވުމެވެ.
އެ ހުރިހާ ބަޔާންތައް ގާނޫނުގައި ބުނާ 14 ދުވަސްތެރޭ ކޯޓުން މިމަހުގެ 15 ވަނަ ދުވަހު ވަނީ އެ ޓީމާއި ހަވާލުކޮށްފައެވެ. މިއަދު ވަކީލުންގެ ޓީމުން ބޭއްވި ބައްދަލުވުމުގައި ވިދާޅުވީ، އެ ހުކުމަކީ ކްރިމިނަލް ކޯޓުން "މޮޑެފައިވާ މަސްހުނި ގަނޑެއް" ކަމަށާއި، އިސްތިއުނާފަށް "ފުދޭވަރަކަށް ވަގުތު ނަގާނެ" ކަމަށެވެ.
ހުކްމް އިސްތިއުނާފް ކުރުމުގެ މަސައްކަތް ޔާމީންގެ ވަކީލުންގެ ޓީމުން ކުރަމުންދާއިރު، އިސްތިއުނާފަށް ހުށަހެޅުމަށް ބަންދު ދުވަސްތަކާއި ނުލައި ގާނޫނުގައި ބުނާ 60 ދުވަސް ލިބޭނެ އެވެ. މިހާރު އޮތީ 48 ދުވަހުގެ މުއްދަތެކެވެ.
ވ.އާރަށު މައްސަލާގައި 11 އަހަރުގެ ޖަލު ހުކުމެއް ޔާމީންގެ މައްޗަށް އިއްވީ ޕީޕީއެމްގެ ރިޔާސީ ޓިކެޓު އެމަނިކުފާނާއި ހަވާލުކޮށް، ވަރުގަދަ ކެމްޕެއިންތަކެއް ކުރަމުން ދަނިކޮށް މިދިޔަ ޑިސެމްބަރު މަހުގެ 25 ވަނަ ދުވަހު އެވެ.
ޔާމީން އަށް އައި ޖަލު ހުކުމާއި ގުޅިގެން އަންނަ ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލިދާނެ ކަމުގެ ބިރުހީވެފައިވާ މިދަނޑިވަޅުގައި އެ ހުކުމް އަވަަހަށް އިސްތިއުނާފު ނުކޮށްފިނަމަ ރިޔާސީ ޓިކެޓު އެމަނިކުފާނަށް ގެއްލިދާނެ އެވެ. މިއަހަރުގެ އިންތިހާބަށް ކެންޑިޑޭޓުންގެ ނަން ހުށަހެޅުން ޖުލައި މަސްތެރޭ ހުޅުވާލާއިރު އެމުއްދަތު އޮގަސްޓަށް ހަމަވާނެ އެވެ.
