މިއަދު ރައްޔިތުންގެ މަޖިލީހަށް އިދިކޮޅު ކޯލިޝަނަށް ނިސްބަތްވާ މަޑުއްވަރީ ދާއިރާގެ މެންބަރު ހުށަހެޅި ކުއްލި މައްސަލަ ފާސް ނުވުމުން ދެން ބަހުސްކުރިއަށް ގެންދަން ފެއްޓެވީ، ރައްޔިތުންގެ މަޖިލީހަށް ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު ހުށަހަޅުއްވާފައިވާ، ދައުލަތުގެ އޮފީސްތަކާއި އިދާރާތައް ހިންގުމަށާއި ގުދަންކުރުމުގެ ބޭނުމަށް އަމިއްލަ ފަރާތްތަކުގެ އިމާރާތްތައް ދައުލަތުން ކުއްޔަށް ހިފުމަށް ގިނަ ޢަދަދެއްގެ ފައިސާ ހޭދަކުރަން ޖެހިފައިވާތީ، މިކަމަށް އަވަސް ހައްލެއް ހޯދުމަށް ހުށަހަޅުއްވާފައިވާ ޤަރާރަށެވެ.
މި ގަރާރަށް ބަހުސް ކުރައްވަމުން، ރާއްޖޭން ވީނުވީއެއް ނޭގި ގެއްލިފައިވާ މީހުން ހޯދުމަށް އަވަސްކުރުމަށް ގޮވާލާ މަޑުއްވަރީ ދާއިރާގެ މެންބަރު ހުށަހެޅުއްވި ގަރާރަކީ ކޮމެޓީއަށް ހުށަހަޅަންޖެހޭ މައްސަލައެއް ކަމަށް ރޮޒައިނާ ވިދާޅުމުން، ރައީސް ނަޝީދު ވަނީ ރޮޒައިނާގެ ވާހަކަ ދެއްކެވުން ހުއްޓުވާފައެވެ.
ރައީސް ނަޝީދު މިހެން ވިދާޅުވެ ރޮޒައިނާއަށް އަނެއްކާވެސް ބަހުސް ކުރައްވަން ފުރުސަތު ދެއްވުމުން، ރޮޒައިނާ ވިދާޅުވީ ގަރާރުގެ ވާހަކަ ދައްކަަނީ ނޫންކަމަށާއި، ނައިފަރު ދާއިރާގެ މެންބަރު އަހުމަދު ޝިޔާމް "ރައްޔިތުންނަށް އޮޅޭގޮތައް ވާހަކަ ދައްކަވާތީ " ސާފުކޮށްދެއްވަނީ ކަމަށެވެ.
ރޮޒޭނާ އަދި ރައީސް ނަޝީދު
ޝިޔާމް ވިދާޅުވީ އޭނާ ދެއްކެވި ވާހަކަފުޅަކުން ރައްޔިތުންނަށް އޮޅޭނަމަ، ރޮޒައިނާ ދައްކަވާ ވާހަކަ ވެސް ދައްކަވަނީ އޮޅުވާލައިގެން ކަމަށެވެ.
ނަޝީދު އަދި ޝިޔާމް
ޝިޔާމްގެ ނިޒާމީ ނުކުތާ ބަލައިގަނެ ރައީސް ނަޝީދު ވަނީ އަނެއްކާވެސް ރޮޒައިނާއަށް ސުވާލެއް ކުރައްވާފައެވެ.. އެގޮތުން "241 ކޮމެޓީގެ މުގައްރިރާ ދިމާވީ ރަސްމީ ސިފައެއްގަތޯ؟ ނުވަތަ މަގުމަތިންތޯ؟" ރައީސް ނަޝީދު އެއްސެވިއެވެ.
އަނެއްކާވެސް ބަހުސް ފައްޓަވާ ރޮޒޭނާ ވިދާޅުވީ މަޖިލީގުގެ ކޮންމެ މެންބަރަކަށް ވެސް މަޖިލީހުގެ ކޮމެޓީތަކުގެ މުގައްރިރުންނާ ވާހަކަ ދައްކައި މައްސަލަތައް ހުށަހެޅޭނެކަމަށެވެ. އަދި "މަޖިލީހުގައި ކަންކަން ކުރިއަށް ދާގޮތް" ހުރިހާ މެންބަރުންނަށް ވެސް އެނގިލައްވާނެކަމަށެވެ.
