ރައްޔިތުންގެ މަޖިލީހުގައި ވާހަކަ ދައްކަވަމުން އިންތި މިއަދު ވިދާޅުވީ، އަނދަގޮނޑިއާއި، ޖަލުގެ ކުޑަ ގޮޅިއާއި ޓިނުގެ ގޮޅިއަށް ލައިގެން ވެސް ރައީސް ނަޝީދަށް ސަރުކާރުތަކުން އަނިޔާކުރިކަަމަށެވެ. ނަމަވެސް ހަމަލާގެ މައުލޫމާތު އެނގިހުރެ ރައީސް ނަޝީދަށް ބޮމުގެ ހަމަލާއެއް ދޭން ފުރުސަތު ދިން ހަމައެކަނި ސަރުކާރަކީ ރައީސް އިބްރާހިމް މުހައްމަދު ސާލިހުގެ ސަރުކާރު ކަމަށެވެ.
އިންތި ވިދާޅުވީ ރައީސް ނަޝީދަށް 2021 ވަަނަ އަހަރުގެ މޭ މަހުގެ 6 ވަނަ ދުހު ދިން ބޮމުގެ ހަމަލާގެ މައްސަލަވެސް ރަނގަޅަށް ނުބެލޭކަމަށެވެ.
އެގޮތުން އެ މައްސަލައިގައި އެންމެ މީހަކު މިހާރު ހައްޔަރުގައި ހުރިއިރު، އޭނާވެސް ހައްޔަރުކޮށްފައި ހުރީ އަމިއްލައަށް އިއުތިރާފް ވުމުން ކަމަށެވެ.
އިންތިގެ ތުހުމަތުތަކާ ގުޅިގެން ރައީސް ސޯލިހު ފެކްޝަނަށް ނިސްބަތްވާ ކެލާ ދާއިރާގެ މެންބަރު އިބްރާހިމް ޝަރީފް ނިޒާމީ ނުކުތާއެއް ވެސް ނެންގެވިއެވެ. ނަމަވެސް ރައީސް ނަޝީދު ވަނީ ކެލާ ދާއިރަގެ މެންބަރުގެ ނިޒާމީ ނުކުތާ ބަލައިނުގަނެ އިންތިއަށް ވާހަކަ ދެއްކެވުމަށް ފުރުސަތު ދެއްވާފައެވެ.
ރައީސް ނަޝީދަށް ހަމަލާ ދިނުމުގެ ތުހުމަތުގައި ހަތް މީހުންނަށް ދައުވާކޮށްފައި ވެއެވެ. އެއީ ގއ. ވިލިނގިލި، ހުދުރުވާގެ، ފަހުމީ އަލީ، އއ. މާޅޮސް އަސަރީގެ، މުހައްމަދު ނާޒިމް، މ. ކުދެހިގެ އިސްހާގު އަހުމަދު، ވ. ތިނަދޫ، ހިޔާ، އަދުހަމް އަހުމަދު ރަޝީދާއި އޭނާއަށް ފިލަން އެހީވި، މއ. ފޭރުގޭ މުޖާޒް އަހުމަދާއި ސައިކަލުގެ ވެރިފަރާތް ކަމަށްވާ ގއ. ކޮނޑޭ، ފޮޅޭމާ ތަހުމީން އަހުމަދުގެ އިތުރުން ބޮން ސައިކަލުގައި ހަރު ކުރި ކަމަށް ބުނާ ނ. މަނަދޫ، ނޫރީގެ، އަލީ ހައިޝަމްގެ މައްޗަށެވެ.
ހަމަލާ ދިނުމުގައި އިސްކޮށް އުޅުނު ކަމަށް ބުނާ އިސްހާގަށް ތިން ދައުވާއެއް ވަނީ ކޮށްފަ އެވެ. އެއީ ގޮވާތަކެތި އެހެން ތަނަކަށް ގެންދިޔުމުގެ ދައުވާ އާއި ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ އެވެ.
ގޮވާތަކެތި އެހެން ތަނަކަށް ގެންދިޔުމާއި ޓެރަރިޒަމްގެ އަމަލެއް ކުރުމަށް ރޭވުމުގެ ކުށް ސާބިތުވެއްޖެ ނަމަ 12 އަހަރާއި 15 އަހަރާ ދެމެދުގެ ޖަލު ހުކުމެއް އަންނާނެ އެވެ. އަދި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ ސާބިތުވެއްޖެ ނަމަ އަންނާނީ 17 އަހަރާއި 20 ދެމެދުގެ ޖަލު ހުކުމެކެވެ.
