މި ފަހަރު އަނެއްކާވެސް ތަފާތު ކަމެކެވެ. ރޮނާލްޑޯ ސޯޝަލް މީޑިއާއަށް މި ފަހަރު ދޫކޮށްލި ކުރު ވީޑިއޯ ކޮޅުގައި ފެންނަނީ އަރަބިންގެ ސަގާފީ ހަރާކާތްތަކަށް ރޮނާލްޑޯ ފައި ހަމަކުރާ މަންޒަރެވެ.
ސައުދީ އަރަބިއްޔާގެ ފައުންޑިން ޑޭ ފާހަގަ ކުރުމަށް އޭނާ މިހާރު ކުޅޭ ކްލަބުގެ ކުޅުންތެރިންނާއެކު ހަރަކާތްތެރިވީ އިރު އަތުގައި އޮތީ ބޮޑު ހަންޖަރެކެވެ. ހަންޖަރަކީ އަރަބިންގެ ސަގާފަތުގައި އެ މީހުންގެ ފަހުރެވެ.
ރޮނާލްޑޯ މި ހަރަކާތްތަކުގައި ލައިގެން ހުރީ އަރަބިންގެ ސަފާގީ ހެދުމެވެ. ހުދު ކުލައިގެ ޖުއްބާއެއްގައި ރޮނާލްޑޯ ހުރިއިރު، އެހެން ފޮޓޯއެއްގައި ޝާހީ ހެދުމެއްގައިވެސް ރޮނާލްޑޯ ހުއްޓެވެ.
ސައުދީ އަރަބިއްޔާގައި މިހާރު ދިރިއުޅޭތާ ދެމަހެއްހާ ދުވަސްވެފައިވާއިރު ރޮނާލްޑޯ އަންނަނީ އެ ތަނުގެ މާހައުލަށް ހޭނެމުންނެވެ. ދަނޑުމަތީގައި ރޮނާލްޑޯ އަންނަނީ ތަފާތު ދައްކަމުންނެވެ.
ސައުދީ ލީގުގައި ރޮނާލްޑޯ އެންމެ ފަހު ކުޅުުނު މެޗުގައި އާދަޔާ ހިލާފު މޮޅު އެސިސްޓެއް ކުރިއިރު އޭގެ ކުރީ މެޗުގައި ހަތަރު ލަނޑު ޖެހިއެވެ. މިރޭވެސް ރޮނާލްޑޯގެ މެޗެއް އެބައޮތެވެ.
