ރައްޔިތުންގެ މަޖިލީހަށް މި މައްސަލަ ހުށަހެޅުއްވީ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ (މޮސްޓާ) އެވެ.
މައްސަލަ މަޖިލީހަށް ބަލައިގަތީ 33 މެންބަރުންގެ ވޯޓުންނެވެ. މައްސަލަ ބަލައިގަންނަން ނުފެންނަކަމަށް ވޯޓު ދެއްވީ ހަތަރު މެންބަރުންނެވެ.
އެ މައްސަލަ ހުށަހަޅުއްވަމުން ނޮޅިވަރަމް ދާއިރާގެ މެންބަރު ވިދާޅުވީ، އެތައް ހާލަކުން ދިވެހި ރައްޔިތުން ހޯދާ ފައިސާ އެކައުންޓުތަކުން ގެއްލެނީ "ސިކުންތުކޮޅެއްގެ ތެރޭގައި" ކަމަށެވެ.
ނޮޅިވަރަމު ދާއިރާގެ މެމްބަރު މުހައްމަދު ނަޝީދު (މޮސްޓާ)--
"ބޭންކް އޮފް މޯލްޑިވްސްގެ އެކައުންޓުތަކުން ފައިސާ ހޯދުމަށް ޕްރޭންކް ކޯލްތަކާއި ލިންކުތައް މެދުވެރިކޮށް އިއާދަނުކުރެވޭފަދަ ބޮޑެތި މައްސަލަތަކެއް އަންނަނީ މެދުވެރިވަމުން،" މެންބަރު ނަޝީދު ވިދާޅުވިއެވެ.
ބޭންކުން ބުނަނީ ކީކޭ؟
ބައެއް ރިޕޯޓުތައް ބުނާގޮތުން ގައުމީ ބޭންކުގެ ކަސްޓަމަރުންގެ އެކައުންޓުގެ މައުލޫމާތުތަކެއް ވަނީ ލީކުވެފައެވެ.
އެ މައްސަލަތަކާ ގުޅޭގޮތުން ބީއެމްއެލުން ކުރިން ނެރުނު ބަޔާނެއްގައި ބުނެފައިވަނީ އެ ބޭންކުން ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް އެހެން މައުލޫމާތެއް އާންމުވެފައި ނުވާނެ ކަމަށާއި ކަސްޓަމަރުން ނުކުރާ މުއާމަލާތްތައް ހިންގާފައިވާ ކާޑުތައް ބްލޮކްކޮށްފައިވާ ކަމަށެވެ.
އެ ބޭންކުން ބުނީ މާޗަންޓެއްގެ ފަރާތުން ކާޑުގެ މައުލޫމާތު ހާމަވާ ހާލަތްތަކުގައި ކަސްޓަމަރުންނަށް ފުރިހަމަ ރައްކާތެރިކަން ލިބި، މާލީގޮތުން އެއްވެސް ގެއްލުމެއް ނުލިބޭނެ ކަމަށެވެ.
ޑިސްޕިއުޓް މަރުހަލާ ނިމުމާއެކު ކަސްޓަމަރުންނަށް ރީފަންޑް ލިބޭނެ ކަމަށްވެސް ބޭންކުން ނެރުނު ބަޔާނުގައި ބުނެފައިވެއެވެ.
