ގައުމީ ބޭންކު، ބޭންކު އޮފް މޯލްޑިވްސް (ބީއެމްއެލް) ގެ އެކައުންޓުތަކުގައި ހުރި ފައިސާ ގެއްލޭތީ ހުށަހެޅު ކުއްލި މައްސަލައަށް ބަހުސްކުރަމުން މޮސްޓާ ވިދާޅުވީ، މިލިއަނުން އަދި ބިލިއަނުން ލޯނު ނައިގެން ތިބި މީހުން ގޮވައިގެން ކޯޓަށްދާ މަންޒަރު ނުފެންނަކަމަށެވެ.
އޭނާ ވިދާޅުވީ، ސަރުކާރުން ވެސް ބޭންކަށް ޕްރެޝަރުކޮށްގެން ރައްޔިތުންނަށް ލުއިފަސޭހަވާނެ ގޮތަކަށް ކަންތައްތައް ކުރުން ބުއްދިވެރިވާނެކަމަށެވެ.
އެ ބޭންކުގެ ބައެއް ބުރާންޗުތަކުން މާލެއަށް ވަކިއުސޫލެއް އަދި އެހެން ރަށްރަށް ވަކި އުސޫލެއް ގެންގުޅޭކަމަށް ވެސް، ބޭންކު އެކައުންޓުތަކުން ފައިސާގެއްލޭތީ ގަރާރު ހުށަހެޅުއްވުމަށްފަހު ވާހަކަ ދައްކަވަމުން މޮސްޓާ ވިދާޅުވިއެވެ.
މޮސްޓާ ވިދާޅުވީ ބީއެމްއެލް ނޫން އިތުރު ހަތް ބޭންކު ރާއްޖޭގައި އެބަހުރި ކަމަށެވެ. ނަމަވެސް އޮޅުވާލައިގެން ފައިސާ ހޯދުންފަދަ ކަންކަން ދެން ހުރި ބޭންކުތަކަށް ދިމާނުވަނީ ކީއްވެތޯ އޭނާ ވަނީ ސުވާލު އުފައްދާފައެވެ.
ބީއެމްއެލްގެ އެކައުންޓުތަކުގައި ހުރި ގިނަ ފައިސާ ގެއްލޭ މައްސަލައިގައި ގިނަބަޔަކު އަންނަނީ މީސްމީޑިއާގައި ކަންބޮޑުވުން ފާޅުކުރަމުންނެވެ.
މި ޝަކުވާތައް މިހެން ހުރި ނަމަވެސް އެ ބޭންކުން ބުނީ މާޗަންޓެއްގެ ފަރާތުން ކާޑުގެ މައުލޫމާތު ހާމަވާ ހާލަތްތަކުގައި ކަސްޓަމަރުންނަށް ފުރިހަމަ ރައްކާތެރިކަން ލިބި، މާލީގޮތުން އެއްވެސް ގެއްލުމެއް ނުލިބޭނެ ކަމަށެވެ.
ޑިސްޕިއުޓް މަރުހަލާ ނިމުމާއެކު ކަސްޓަމަރުންނަށް ރީފަންޑް ލިބޭނެ ކަމަށްވެސް ބޭންކުން މި މައްސަލައިގައި ނެރުނު ބަޔާނުގައި ބުނެފައިވެއެވެ.
