ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީ އާއި މިނިވަން މުއައްސަސާތަކާ ބެހޭ ކޮމިޓީއާ ބައްދަލުކުރުމަށް ފަހު، މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ޖަމިއްޔާގެ ރައީސް ހުސެއިން ޝަރީފް ވިދާޅުވީ، ނޫސްވެރިންނާއި ހަމަޔަށް އެ އެދުމާއިއެކު އަންނަންޖެހުނު ސަބަބަކީ، ގާނޫނޫ އަސާސީ އާއި ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކޮށްދޭ ގާނޫނުން ކަށަވަރުކޮށްދީފައިވާ ސިއްރު ވޯޓެއް ލުމުގެ ހައްގުން މަހުރޫމުވެފައިވާތީ ކަމަށެވެ.
ޝަރީފް ވިދާޅުވީ، އެމަސައްކަތްތަކުގެ ތެރެއިން ކޮންމެ ފަހަރަކުވެސް ލިބޭ ޖަވާބަކީ އިންތިހާބަށް ވަގުތު ކުޑަތަންވެފައިވާތީ ނުވަތަ ބަޖެޓު ނެތުމުން އެކަން ނުކުރެވި އޮންނަ ވާހަކަ ކަމަށެވެ. އެކަނި ވޯޓު ލުމުގެ އިންތިޒާމެއް ހަމަޖެހިފައި ނެތުމުން ކޮންމެ ރައްޔިތަކަށް އޮންނަ ސިއްރު ވޯޓުގެ ހައްގު ލޯފަން މީހުންގެ އަތުން ނިގުޅައިގަނެވިފައިވާކަން އެ ޖަމިއްޔާއިން ފާހަގަކުރި އެވެ.
ލޯފަންވުމުގެ ސަބަބުން އާއިލާ ނުވަތަ ރަށްޓެއްސަކާއި އެކު ވޯޓުލާންދާން ޖެހޭތީ، އަމިއްލަ މިނިވަންކަން މަތީގައި ވޯޓުލުމުގެ ފުރުސަތު ނޯންނަކަން އެ ޖަމިއްޔާއިން ފާހަގަކުރި އެވެ.
ބައެއްގެ ހުރި ނުކުޅެދުންތެރި ކަމެއް، ލޯފަން މީހުންނަށް ނުޖެއްސުމަށް އެދި އެޖަމިއްޔާއިން މިއަދު ބުނީ، ލޯފަން މީހުންނަށް ވިޔަސް ވޯޓުލުމުގައި ނުކުޅެދުންތެރިވެގެން އުޅެނީ އެ އިންތިޒާމުތައް ހަމަޖައްސަންތިބި ބައެއްގެ ނުކުޅެދުންތެރިކަމުން އެފަދަ ވަސީލަތްތަކާއިއެކު އެ ހައްގު ކަށަވަރު ނުކޮށްދެވޭތީ ކަމަށެވެ.
އެގޮތުން އާންމު މީހަކަށް ގަލަމެއް ނެތިގެން ވޯޓުނުލެވޭހެން، ލޯފަން މީހުންގެ ފަރާތުންވެސް އެދެނީ ގަލަމުގެ އިތުރުން ބޭނުންވާ އެއްޗެއް ހުރުމުން އެ އެއްޗެއް ފޯރުކޮށްދިނުމަށް ކަމަށް އެ ޖަމިއްޔާއިން ބުންޏެވެ. އަދި އެ ވަސީލަތްތައް ފޯރުކޮށްދީފިނަމަ ލޯފަން މީހުންނަކީވެސް، އާންމު މީހަކަށް ވޯޓުލެވޭހެން، ވޯޓުލެވިދާނެ މީހެއްކަން އެ ޖަމިއްޔާއިން ފާހަގަކުރިއެވެ.
އެހެންވެ، އެޖަމިއްޔާއިން މިއަދު އެދުނީ އެ ފުރުސަތު އެފަރާތްތަކަށް ފޯރުކޮށްދިނުމަށް ހުރިހާ ފަރާތްތަކުން މަސައްކަތްކޮށްދިނުމަށެވެ.
