ފަރެސްމާތޮޑާގައި ތަރައްގީކުރާ އެއާޕޯޓު މި މަހުގެ 15 ވަނަ ދުވަހު ހުޅުވުމަށް ސަރުކާރުގެ ފަރާތުން ތައްޔާރުވަމުންދާއިރު، ފަރެސްމާތޮޑާއިން އެއާޕޯޓަށް ދިއުމަށް ތަރައްގީކުރާ ބްރިޖުގެ މަސައްކަތް އެ ދުވަހަށް ނުނިމޭނެ ކަމަށް އެމްޓީސީސީން ވަނީ ބުނެފައެވެ.
ދައުލަތުގެ މީޑިއާއަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވެފައިވަނީ ފަރެސްމާތޮޑާ އެއާޕޯޓް ބްރިޖުގެ މަސައްކަތް ލަސްވީ ޕްލޭންކުރި ވަރަށް ވުރެ ބޮޑެތި ތަނބުތައް އެ ސަރަހައްދަށް ފައްތަން ޖެހުމުން ކަމަށެވެ.
އާޒިމް ވިދާޅުވި ގޮތުގައި ބްރިޖުގެ މަސައްކަތް ނުނިމޭތީ ފަރެސްމާތޮޑާއިން އެއާޕޯޓަށް އައުމަށް ވަގުތީ މަގެއް ހަދަމުންދާ ކަމުގައެވެ. ކައިރި ރަށްރަށުންނާއި ރިސޯޓުތަކުން މީހުންނަށް އާދެވޭނެހެން ބަނދަރެއް ނިންމާފައިވާ ކަމަށާއި ކީވޯލްގެ މަސައްކަތް މިހާރު ނިމިފައިވާ ކަމަށް އާޒިމް ވިދާޅުވިއެވެ.
މީގެކުރިން އެމްޓީސީސީން ބުނެފައިވަނީ ފަރެސްމާތޮޑާއިން އެއާޕޯޓަށް ދިއުމަށް ތަރައްގީކުރާ ބްރިޖުގެ މަސައްކަތް އަންނަ މެއި މަހުގެ ނިޔަލަށް ނިމޭނެ ކަމަށެވެ.
އެއާޕޯޓުގެ ހުރިހާ މަސައްކަތެއް ނިންމާ އެއާޕޯޓް ހުޅުވުމަށް ވާންޖެހޭ އެންމެފަހުގެ ތައްޔާރީތައް ދަނީ ވަމުންނެވެ. އެ އެއާޕޯޓު އޮޕަރޭޝަނަށް ގެނައުމަށް އިންސްޕެކްޝަންގެ މަސައްކަތް ކަމާ ގުޅުންހުރި ފަރާތްތަކުން ދަނީ ކުރަމުންނެވެ. ރީޖަނަލް އެއާޕޯޓްސްއިން ދަނީ އެއާޕޯޓުގެ ވަޒީފާތަކަށް މީހުން ނެގުމުގެ މަސައްކަތް ކުރަމުންނެވެ.
އެތެރޭގެ އުދުހުންތަކަށް ހާއްސަކޮށްގެން ތަރައްގީ ކުރި މި އެއާޕޯޓުގައި 1،200 މީޓަރުގެ ރަންވޭ އެއް އަޅައި ޓެކްސީވޭއަކާއި އޭޕްރަންއަކާއި ފަޔަ ޕެޑް އަދި ފަޔަ ރޯޑެއްގެ އިތުރުން ފަޔަ ބިލްޑިން އިމާރާތެއް ވަނީ ތަރައްގީކޮށްފައެވެ.