އިދިކޮޅު އެމްޑީޕީއަށް ނިސްބަތްވާ މެމްބަރު މައުރޫފްގެ މައްޗަށް ފުލުހުން ވަނީ ތިން ތުހުމަތެެއް ކޮށްފައެވެ. އެ ތުހުމަތުތަކީ ކަނޑުދަތުރުކުރުމަށް ހުރަސްއެޅުމާއި ކޯސްޓް ގާޑަށް ގެއްލުން ދިނުމާއި ފުލުހުންގެ ވާޖިބަށް ހުރަސްއެޅުމެވެ.
އެހެންނަމަވެސް މި ތުހުމަތުތަކަށް މައުރޫފް ވަނީ މިއަދުގެ ބަންދުގެ މަޖިލީހުގައި އިންކާރުކޮށްފައެވެ.
ބޮޑުކަންނެލި މަސްވެރިން ކުރި މުޒާހަރާތަކާއި ގުޅިގެން މައުރޫފްގެ އިތުރުން އިތުރު ދެ މީހަކުވެސް ހައްޔަރުކުރިއެވެ. އެ ދެމީހުންގެ ބަންދަށްވެސް ކޯޓުން ވަނީ ފަސް ދުވަސް ޖަހާދީފައެވެ.
މަސްވެރިންގެ ޔޫނިއަންގެ އެއް ފައުންޑަރުގެ ގޮތުގައި ހިމެނޭ އަދި އެ ޔޫނިއަންގެ ޖެނެރަލް ސެކްރެޓަރީގެ މަގާމުގައި ހުންނެވި މައުރޫފް ކޯޓަށް ހާޒިރުކުރި އިރު، އޭނާ ނިސްބަތްވާ އިިދިކޮޅު އެމްޑީޕީގެ އިސް ބައެއް ބޭފުޅުންނާއި މަސްވެރިން ވެސް ކޯޓު ދޮށަށް އެއްވެ، އެންމެން މިނިވަންކުރަން ގޮވާލަމުން ދިޔައެވެ.
މަސްވެރިންގެ ދުވަހާ ގުޅިގެން ބޮޑު ކަންނެލި މަސްވެރިންގެ ޔޫނިއަނުން އިހުތިޖާޖު ފެށީ، މިދިޔަ ބުދަ ދުވަހުގެ ހެނދުނު 09:00 ޖެހިއިރުއެވެ. ކަންނެލި މަސްވެރިން އިހްތިޖާޖުކުރަމުން ދިޔައީ ދޯނިތައް މާލޭގެ އުތުރު ފަރާތު ފަޅު ބޭރުގައި އަަޅައިގެން އޭގައި ތިބެގެންނެވެ.
މި އިހްތިޖާޖާއި ގުޅިގެން ފުލުހުން މައުރޫފާއި އިތުރި ދެމީހުން ހައްޔަރުކުރީ އިއްޔެ މެންދުރުފަހު އެ ދޯނިތަކަށް އަރައެވެ. އަދި އެ އިހްތިޖާޖުގައި ބޭނުންކުރި ދެ ދޯންޏެސްވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
