އިސްލާމިކް މިނިސްޓްރީގެ އޮފިޝަލަކު ވިދާޅުވީ އިތުރު 500 ހައްޖު ކޯޓާ ލިބޭނެކަން މިހާރު ގާތްގަނޑަކަށް ޔަގީން ވެފައިވާކަމަށެވެ. ނަމަވެސް އެއީ މިވަގުތައް އަދި ސިއްރެއްކަމަށް އޮފިޝަލް ވިދާޅުވިއެވެ.
އޮފިޝަލް ވިދާޅުވީ އިތުރަށް ލިބޭ ކޯޓާގެ ތެރެއިން ބައެއް އަނެެއްކާ ހައްޖު ގުރޫޕްތަކަށް ދިނުމަށް މިނިސްޓަރު މަސައްކަތް ކުރައްވަމުން ގެންދަވާތީ ކަންބޮޑުވުންތަކެއް އެބަހުރި ކަމަށެވެ.
ނަން ނުޖެހުމަށް ޝަރުތުކޮށް އޮފިޝަލް ވިދާޅުވީ އަލަށް ލިބޭނެ ކަމަށް ބެލެވޭ 500 ކޯޓާގެ ތެރެއިން ވެސް 120 ކޯޓާ އަމިއްލަ ޖަމާއަތްތަކަށް ދިނުމަށް މިނިސްޓްރީ ތެރެއިން މަސައްކަތް ކުރަމުން ގެންދާކަމަށެވެ. އެގޮތަށް އެކަންކުރަން މިނިސްޓްރީގެ ތެރެއިން ބައެއް ބޭފުޅުން ދެކޮޅު ހަދަނީ މިހާރުވެސް ހައްޖަށް ދާން ފައިސާ ދައްކާފައި ހައްޖު ކޯޕަރޭޝަންގެ ދަފްތަރުގައި އެތައް ހާސް ބަޔަކު ތިބުމުންކަމަށް އޮފިޝަލް ވިދާޅުވިއެވެ.
އޮފިޝަލް އިތުރަށް ވިދާޅުވީ މިހާރު ސައުދީން ރާއްޖެއަށް ދީފައިވާ ކޯޓާގެ ތެރެއިންވެސް ހައްޖު ކޯޕަރޭޝަނަށް ފައިސާ ދައްކާފައިވާ މީހުންގެ ތެރެއިން ޖާގަ ލިބެނީ މަދު ބަޔަކަށް ކަމަށެވެ. އެގޮތުން ތިން ކުންފުންޏަކަށް ޖުމްލަ 270 ކޯޓާ ދޭން ނިންމާފައިވާއިރު މިނިސްޓްރީގެ ބޭނުމަށް 150 ކޯޓާ ހިފަހައްޓާފައިވާކަމަށް އޮފިޝަލް ވިދާޅުވިއެވެ.
އެހެން ކަމުން ހައްޖު ކޯޕަރޭޝަނަށް ފައިސާ ދައްކާފައިވާ 4000 އަށް ވުރެ ގިނަ މީހުންގެ ތެރެއިން ފުރަތަމަ ލިބުނު ކޯޓާއިން ހައްޖަށް ދެވެނީ 550 މީހުނަށް ކަމަށްވެށް އޮފިޝަލް ވިދާޅުވިއެވެ.
ހައްޖު ކޯޓަތަކާ ގުޅިގެން އުފެދިފައިވާ ތުހުމަތުތަކަށް ޖަވާބެއް ހޯދުމަށް އިސްލާމިކް މިނިސްޓަރަށް ގުޅުއްވުމުން ފޯނަށް ޖަވާބެއް ނުދެއްވައެވެ.
