19 ވަނަ ރައްޔިތުންގެ މަޖިލީހުގެ މިދައުރުގެ 22 ވަނަ ޖަލްސާގައި، ހެންވޭރު ހުޅަނދު ދާއިރާގެ މެމްބަރު ހަސަން ލަތީފް ހުށަހެޅުއްވި، "މަސްތުވާތަކެއްޗަށް ދެވިހިފާފައިވާ މީހުންނަށް ފަސޭހައިން ފަރުވާ ދިނުމަށް ކަންކަން ބަދަލުކުރުމަށް ސަރުކާރަށް ގޮވާލާ ހުށަހެޅި ގަރާރަށް ބަހުސް ކުރުމުމަށް ހުޅުވާލެވުނު ފުރުސަތުގައި ވާހަކަދައްކަވަމުން މުހައްމަދު ނަޝީދު (މޮސްޓާ) ވިދާޅުވީ ނުރައްކާތެރި މަސްތުވާތަކެއްޗޭ ކިޔައިގެން މިދައްކަނީ ކޮންވާހަކައެއްކަމަށް އެބޭފުޅާއަށް ވިސްނިވަޑައިނުގަންނަވާ ކަމަށާއި، އެއީ މިހާތަނަށް ރާއްޖޭގައި ހިންގާފައި ހުރި އެއްމެ ނުރައްކާތެރި ޖަރީމާތައް ހިންގާފައިވަނީ ރަލު މަސްތުގައި ތިބެގެންކަމަށެވެ.
އެހެންނަމަވެސް، ރާ ވިއްކުން ހުއްޓުވުމަށް ނުވަތަ ރަލުގެ ބޭނުންކުރާމީހުންނަށް ފަރުވާދިނުމުގެ އެއްވެސް ވާހަކައެއް ނުދެކެވޭކަމަށާއި އަދި ރާ ވިއްކާމީހުންނަކީ ކުށްވެރިންކަމަށްވެސް ދައުލަތަކުން ނުދެކޭކަމަށްވެސް މޮސްޓާ ވިދާޅުވިއެވެ.
ރާ ވިއްކާމީހުން "އޮނަރަަބަލުންނަށް" އަދި މަގުމަތީގައި ރަބަރު ޕެކެޓެއް ހިފައިގެން އުޅޭ ކުއްޖާ "ގުންޑާއަކަށް" ހަދާލަގަބުދީފައިވާ ކަމަށާއި، އެއީ އެހެން ކުރެވިގެންވާނެ ކަމެއް ނޫން ކަމަށާއި ރަލަކީ ވެސް މަސްތުވާއެއްޗަކަށްވާއިރު، ރާ ބޮއެ ރަލުގެ ވިޔަފާރިކުރާ މީހުންނަށްވެސް މަސްތުވާ އެހެން އެއްޗިއްސަށް ދިނުމަށް އޮންނަ އަދަބުދީ، އެއް އުސޫލަކުން ކަންކަންނުކުރާ ކަމީ ވަރަށް ކަންބޮޑުވެ ވަޑައިގަންނަވާ ކަމެއްކަމަށްވެސް މޮސްޓާ ވިދާޅުވިއެވެ.
ދިވެހިރާއްޖޭއަށް ރާ އެތެރެކޮށް އޭގެ ވިޔަފާރިކުރެވެނީ ސަރުކާރުން ވަކި ހާއްސަ ހުއްދައެއް ނަގައިގެންނެވެ. އަދި ދިވެހިން ދިރިއުޅޭ ރަށެއްގައި ރާ ވިއްކުމުގެ ހުއްދަ ދީފައި ނޯންނަކަން ވެސް ފާހަގަކުރެވެެއެވެ. އެހެންނަމަވެސް، މާލެ އާއި ރާއްޖެތެރޭގެ އެކި ރަށްރަށުގައި ވަރަށް ފުޅާ ދާއިރާއެއްގައި ރަލުގެ ވިޔަފާރިކުރާކަން ވެސް މިފުރުސަތުގައި ފާހަގަކޮށްލަމެވެ.
