"ސިޔާމާއި ހިލްޓަންގެ މައްސަލަ: ރާއްޖެ އިން އިންވެސްޓަރުންނަށް ރަތުގެ އިންޒާރެއް" މި ސުރުހީގެ ދަށުން ދައުރުގައި ލިއުނު ރިޕޯޓަކާއި ގުޅިގެން ޝިޔާމް ގުޅުއްވާ ދައުރުގެ ނޫސްވެރިއަކަށް ބިރުދައްކާ އިންޒާރު ދީފައިވާކަމަށްބުނެ، މޯލްޑިވްސް ޖާނަލިޒަމް އެސޯސިއޭޝަން (އެމްޖޭއޭ) އެކަން ކުށްވެރިކޮށްފައެވެ.
މިމައްސަލަ ފުލުހުންނަށްވެސް ހުށަހަޅާފައިވާއިރު ފުލުހުންވެސް އަންނަނީ މައްސަލަ ބަލަމުންނެވެ.
ދައުރުގެ ރިޕޯޓާއި ގުޅިގެން ސިޔާމް އިއްޔެ މެންދުރު ވަގުތެއްގައި ގުޅައި "ފަހުގެ އިންޒާރު" ކަމަށް ބުނެ ނޫސްވެރިންނަށް ބިރުދައްކާފައިވާކަމަށް "ދައުރު" ނޫހާއި ހަވާލާދީ އެމްޖޭއޭ އިން ބުނެފައިވެއެވެ.
ޝިޔާމްގެ އިންޒާރަށް ފަހު، އާޓިކަލް ލިޔުނު އަހުމަދު ނާއިފަށާއި ސީނިއާ އެޑިޓަރަށްވެސް އެކި ނަމްބަރުތަކުން އެތައް މެސެޖެއްކޮށް، މަރުގެ އިންޒާރު ދީފައިވާކަމަށް ދައުރާއި ހަވާލާދީ އެމްޖޭއޭއިން ބުނެއެވެ.
ސީރިއަސް މައްސަލައެއްގެ ގޮތުގައި ބަލައި ނޫސްވެރިންނަށް ދޭންޖެހޭ ރައްކާތެރިކަން ދިނުމަށްވެސް އެމްޖޭއޭއިން ގޮވާލަފައި ވެއެވެ.
މިމައްސަލައާއި ގުޅިގެން "ސީއެމްއެމް" އިން ޝިޔާމަށް ގުޅުމުން ފޯނު ނުނަންގަވާތީ ޝިޔާމްގެ ބަހެއް ލިބޭގޮތެއް ނުވިއެވެ.
