މަޖޫ ތައާރަފްވެފައިވަނީ 2009 ވަނަ އަހަރު ފިލްމީ ދާއިރާއިރާއިންނެވެ. އޭނާ އެންމެ ފުރަތަމަ ކުޅުނު ޓީވީ ސީރީޒްއަކީ "ކުރުކޮށް ފޮނިކޮށް "ކިޔާ ކޮމެޑީ ޑްރާމާ ސީރީސްއެކެވެ. 

ސީ.އެން.އެމް އަށް ދިން އެކްސްކުލޫސިވް އިންޓަވިއުއެއްގައި މަޖޫ ބުނީ އެނާއަށް ޔޫސޭގެ ހުނަރުފެނި "އިންޕްރެސްވީ" މޫމިން ފުވާދު ލިޔެ ޑައިރެކްޓުކުރި ވެބް ސީރީޒް "ގަމިނި" ގައި ޔޫސޭ ކުޅެފައިވާ މޮޅު ރޯލު ފެނުމުންކަމަށެވެ.  

ފިލްމީ ދާއިރާގެ އެއްވެސްމީހަކާއެކު މަސައްކަތް ކުރަން އުނދަގޫ ނޫން ކަމަށް މަޖޫބުންޏެވެ. ކޮންމެ މަސައްކަތެއް ފިލްމީ ދާއިރާގައި ކުރި ނަމަވެސް، އެ މަސައްކަތެއް ކުރަނީ ކުރާހިތުން ކަމަށް މަޖޫބުންޏެވެ. 

އޭނާ މިގޮތުން އެންމެ ފާހަގަކޮށްލެވޭ މަސައްކަތެއް ކޮށްފައިވަނީ، ފިލްމު "ބަޅިނދު" ގައި ފިލްމީތަރި އަހުމަދު އާސިމާއެކު ކަމަށް ވެސް މަޖޫބުންޏެވެ.

މިހާރު ކުރަމުންދާ މަސައްކަތް ތަކަށް އަލިއަޅުވާލަމުން މަޖޫ ބުނީ މިވަގުތު އޭނާ ޝޫޓު ކުރަމުން އަންނަނީ "ޤަރީނާ" ކިޔާ ފިލްމެއްގައި ކަމަށެވެ. ނަމަވެސް ރޯދަ މަހަށް ޝޫޓިން ހުއްޓާލާފައި އޮތްކަމަށް މަޖޫ ބުންޏެވެ. މިހާރު 75 ޕަސެންޓް ނިމިފައިވާ "ޤަރީނާ"ގެ ބާކީ 25 ޕަސެންޓްގެ މަސައްކަތް ރޯދަ ނިމުނުހާ އަވަހަކަށް ތާވަލް ކުރެވިފައި ވާކަމަށެވެ.

ފިލްމު ކުޅުމުގެ އިތުރުން ވެސް ހުނަރުވެރިއެއް: 

މޭކަޕް ކުރުމަށް ވެސް ޝައުގުވެރިކަން ހުންނަ މަޖޫ ބުނާ ގޮތުން އެއީ ހަމައެކަނި ހޮބީއެއްގެ ގޮތުގައި ކުރާކަމެއް ކަމެކެވެ. ނަމަވެސް އާމްދަނީ އެއް ހޯދުމުގެ ގޮތުން ވެސް ކުރަން ވަރަށް ރަނގަޅުކަމެއް ކަމަށް މަޖޫ ބުނެއެވެ. މިގޮތުން އަހުމަދު އާސިމް ޑައިރެކްޓު ކުރި ބައިސްކޯފުގެ ސީރީޒް "ވިހާލި" ސީރީސްގެ 3 އެޕިސޯޑެއްގައި މަޖޫގެ މޭކަޕް ފެނިގެން ގޮސްފައިވެއެވެ.  

މަޖޫގެ ފިލްމީ ދާއިރާގެ ތަޖުރިބާތައް: 

މިހާތަނަށް އެކި ޝޫޓިންގް ތަކުގައި ދެވުނު ރަށްތަކުގެ ތެރެއިން މ. މުލަކުން ލިބުނު އެއްބާރުލުން ފާހަގަ ކުރަމުން މަޖުދާ ބުނީ އެންމެ މީރު ކާއެއްޗެހި ވެސް ލިބިފައި ވަނީ މ. މުލަކުން ކަމަށެވެ. ހަމަ މިއާއި އެކު އެންމެ ބޮޑު ސަޕޯޓެއް ލިބުނީ އައްޑޫ ސިޓީންކަމަށް މާލެ ސިޓީއަށް ނިސްބަތްވާ މަޖުދާ ބުންޏެވެ. 

ދިވެހި އުފެއްދުންތަކުގެ ތެރެއިން އެންމެކަމުދަނީ މޫމިން ފުއާދު އާއި އަލީ ޝިފާއު (ޗިއްޕެ) ގެ ފިލްމްތައްކަމަށް އޭނާ ބުންޏެވެ. 

އޭނާގެ ފިލްމީ ދާއިރާގެ ތަޖުރިބާތައް ހިއްސާކުރަމުން އޭނާ ބުނީ، އޭނާ އެންމެ ދެރަ ވަނީ ބައެއް ފަހަރު ފިލްމީ ދާއިރާއަށް ދޭންޖެހޭ އެއްބާރުލުން މުއައްސަސާތަކުން ނުލިބޭތީކަމަށެވެ. 

އެންމެ ދަތިވަނީ ފިލްމެއްގެ މަންޒަރެއް ޝޫޓް ކުރަން ދާ އިރު ބައެއް ފަހަރަށް ހުއްދަ ނަގަން ޖެހޭ ތަންތަނުން ހުއްދަ ނުލިބިގެން ޝޫޓިންގްތައް ލަސްވެ ބައެއް ފަހަރު ސްޓާރުންނަށާއި ފިލްމް އުފައްދާ ފަރާތްތަކަށް ވެސް ގެއްލުންތައް ލިބޭތީ. ހޮލީވުޑް ފަދަ ތަންތާގައި ހުންނަ ފިލްމީ އޭރިޔާތަކާއި ސެޓްތައް ރާއްޖެއިން ފެންނާނެ ދުވަހެއް ދެކެން ވަރަށް ބޭނުން- މަޖޫ 

ހަނދާނުން ފުހެލަން އެންމެ ދަތި ކަމަކީ ކޮބާތޯ ސުވާލު ކުރުމުން މަޖުދާ ބުނީ ހަނދާނުން ފުހެލަން އުނދަގޫ އެއްވެސް ކަމެއް ނެތް.