ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހަށް މި މައްސަލަ ހުށަހަޅުއްވާފައިވަނީ ޕީއެންސީއަށް ނިސްބަތްވާ އެޕާޓީގެ ނައިބު ރައީސް އަދި މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އެވެ.
އާދަމް ޝަރީފް މިއަދުގެ ޖަލްސާގައި ހުށަހެޅި މި މައްސަލައިގައި ބުނެފައި ވަނީ ރާއްޖޭގެ ހާއްސަ އިގްތިސޯދީ ސަރަހައްދުން ބައެއް ގެއްލޭފަދަ ގޮތަށް ރާއްޖެއިން ބައެއް ވިއްކާލުމަށް ރާއްޖޭގެ ސަރުކާރުން މޮރިޝަސްގެ ސަރުކާރުން ޑީލް ހަދާފައިވާ ކަމަށާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މޮރިޝަސްގެ ސަރުކާރަށް ފޮނުއްވި ސިއްރު ސިޓީ ރައްޔިތުންނަށް ހާމަ ކުރަން ޖެހޭ ކަމަށެވެ.
ކުއްލި މައްސަލައަށް ބަހުސް ކުރަން ފެންނަ ކަމަށް ވޯޓު ދެއްވާފައިވަނީ 23 މެންބަރުންނެވެ. ނުފެންނަ ކަމަށް ވޯޓު ދެއްވީ 19 މެންބަރުންނެވެ.
ކުއްލި މައްސަލައިގެ ބަހުސް މަރުހަލާގައި ވާހަކަފުޅު ދައްކަވަމުން އާދަމް ޝަރީފް ވިދާޅުވީ ދިވެހި ރާއްޖޭގެ ބިމުން ވެލިފުކެއްގެ މިންވަރު ވިޔަސް އަދި ރާއްޖޭގެ ކަނޑުގެ ސަރަހައްދުން ކޮޑި އިންޗިއެއްގެ މިންވަރުވިޔަސް އެއްވެސް ބަޔަކަށް ދިނުމަކީ އަދި ވިއްކުމަކީ ދިވެހިން ނިހާޔަތައް ދެކޮޅު ހަދާ ކަމެއް ކަމަށެވެ.
މައްސަލައިގައި ރާއްޖޭގެ ރައްޔިތުންގެ އެންމެ މަތީ މަސްލަހަތު ހިމާޔަތް ކުރުމުގެ ބަދަލުގައި އެހެން މިސްރާބަކަށް މި މައްސަލަ ގެންގޮސްފައިވާ ކަމަށާއި މި މައްސަލައިގައި ޑރ. މުނައްވަރު، އާޒިމާ ޝުކޫރު އަދި ދިޔާނާ ސައީދު ފަދަ ބޭފުޅުންގެ ހިޔާލުފުޅެއް ހޯއްދަވާފައި ނުވާތީ އާދަމް ޝަރީފް ވަނީ ކަންބޮޑުވުން ފާޅުު ކުރައްވާފަ އެވެ.
މޮރިޝަސް މައްސަލައާއި ގުޅިގެން ހުށަހެޅި ކުއްލި މައްސަލައަށް މަޖިލީހުގައި ބަހުސް ކުރަމުން ދާއިރު އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި ކުރިއަށްދާ ދިވެހިރާއްޖެއާއި މޮރިޝަސްގެ ކަނޑުގެ ސަރަހައްދާ މެދު އުފެދިފައިވާ ހިޔާލުތަފާތުވުމާ ގުޅޭ މައްސަލައިގައި ހުކުމް ކުރުން ވަނީ އަންނަ ހުކުރު ދުވަހަށް ތާވަލުކޮށްފަ އެވެ.
